Paletwa ah AA Umnak Nawl CNF Nih An Pek Hna Timi Bia hi An Theihpalhmi A Si_Dr. Sui Khar

Salai Josephbawi| 2019 September 22| The Chinland Post Hakha| AA Paletwa an ummi hi Chin National Front (CNF) nih umnak nawl an pekchung hna caah a si tiah an chim tawnmi hi a diklomi an itheihpalhmi tu a si tiah CNF AGS II Dr. Sui Khar nih a chim.

Paletwa ram ah Arakan Army (AA) an umnak a ruang cu CNF nih caan karlak umnak nawl an pek hna caah a tu bantuk harnak le buaibainak kan ton hi a si tiah U Kyaw Nyin (KACC) nih Chin World ah a chim. Hi kong he pehtlai in Chin Ramkulh Cozah le Chin Media tonnak ah chimrelnak nawl ngeitu U Seo Thet zong nih Paletwa ah AA an umnak a ruang cu CNF nih caan karlak umnak nawl kan pek hna tiah Dr. Sui Khar nih a timi caah a si tiah a rak chim.

Hi kong he pehtlai in CNF AGS I Dr. Sui Khar nih “Khakha an theihpalhmi a si mu. Zeitik hmanh ah AA hi Paletwa ah um u kan ti balloh. Anmah tu nih an kan timi cu Rakhine ram ah hmunkhurnak caah chikkhat kan umchung mi a si ko ee an kan ti lengmang. Kanmah nih kan cohlan baklomi a si” tiah The Chinland Post ah a chim.

“Dr. Sui Khar nih a ti tiah a chimtu an um ahcun amah teh tha tein nan hal maw tiah rak hal hna u” tiah a biapeh ah a chim.

CNF le Cozah biachah hnatlakningin Chin ram ah CNF le Kawl ralkap lawng umnak nawl ngeihding tiah bia an chat ko nain atu bantuk in Arakan Army cu Paletwa ah hmun an khur hi Ralkap he an ituk cuahmah lio a si.

Hi kong he pehtlai in CNF/A upa pakhat nih Paletwa cu CNF/A kan rak um peng nak a si. Kahngolnak min kan thut hnu in umnak nawl kan halthan tik hna ah Ralkap nih an kan pe duh lo. Anmah ralkap nih le kanmah kan um lo tikah an Sakhan pawl an thumh I a tu bantuk AA nih an duh tawk in hmunhma an van laknak hi a si. Hmunhma le cawlcanghnak nawl kan pe hna sehlaw a daiding a si ko tiah a chim.

CNF cu Mah te khuakhan larelnak (Self-determination), Ramkomh Federal sernak le Democracy dik ngah khawhnak caah 1988 March 20 rak dirhmi a si. Thein Sein Cozah chan 2011 kum August thla ah kahdaih hnatlaknak tuah dingin sawm a si i 2012 in Cozah he Ramkulh le Ramkomh level ah Kahdaihhnatlaknak le Rampi huap kahngolh hnatlaknak (NCA) min a thumi Chin dothlennak a tuahmi hriamtlai phu a si.