Paletwa ah CNF/A Ralkap an phan; Kawl Ralkap le Cozah nih ralrinnak an pek

Salai Tluangkipthang & TCP Hakha —  KUM 2015 thawk in Kawl Ralkap le Arakan Ralkap (AA) kahdohnak ruang ah hartong le buaibai in a ummi Chin ramkulh thlanglei ah Chin National Front/Army (CNF/A) ralkap an phan cang tiah theih a si.


“CNF/A kan ralkap hna cu Paletwa ah an phanhnak cang” tiah CNF/A cunglei lutlai sin in kan theih.

Hi kong he pehtlai in, CNF/A nih 2020 March 16 in 19 karlak ah an tuahmi Conference ah biafunnak an tuahmi cathanh ah Chin ramkulh Paletwa cu Kawl Ralkap le AA an i kahdoh ruang ah miphun caah thinphannak (biapimi) ri (emergency) kan phan tiah an rak thanh.

CNF Cathanh, March 2020


Chin hriamtlai phu cu 2011 November 19 ah Thailand ram Mae Sai khuapi ah Cozah palai U Aung Min hruaimi le CNF/A in Pu Zing Cung le Dr. Sui Khar he tiah kahdaihnak biaruah ding ah an rak thawk.

Cucu, kahdaihnak tuah ding in biaruahnak an rak ngaih hnu ah 2012 January 6 ah hnatlaknak 9 in siseh, 2012 March 7 ah hnatlaknak 15 in siseh ramkulh cozah he cahren an rak ngei kho. Cu hnu ah, 2012 December 7 ah Ramkomh cozah he kahdaihnak caah biaruahnak an rak ngeih than i, hnatlaknak 28 an rak ngei kho. CNF/A le Ramkomh Kawlram cozah nih hnatlaknak an ngeihmi hi a phun 52 an rak ngei kho.

Kahdaihnak minthut ning in CNF/A cu Paletwa ah meithal he umkal an ngah lo nain, miphun humhimnak caah Paletwa ah umhmun khuar ding in an kal hi a si. Hiti CNF/A nih Paletwa lei ah umhmunkhuar ding in an kal ruang ah, Kawl Ralkap nih ralrinnak (Ya-za-tan) an pek hna i, Aung San Suu Kyi nih remdaihnak caah a hruaimi National Reconciliation and Peace Centre (NRPC) zong nih ralrinak ca an pek hna tiah theih a si.

“Kan Ralkap pawl Paletwa ah umhmun khuar ding in kan thlah hna ruang ah Monywa hrambunh Northwestern Command nih ralrinnak ca (Ya-za-tan) an kan pek” tiah CNF/A cunglei lutlai pakhat nih a chim.

Chin miphun hriatlai phu nih Paletwa ah umhmun khuar ding in an phanh hi a nithla dikthliar cun theih a si lo nain, a luan ciami kum chung ah si dawh a si.

CNF nih Para/Pathiantlang kiangkap ah hmunhma panga (5) cu 2012, 2013 ah Ramkulh (state) le Ramkomh (union) cozah sin ah an hal nain i ceih than ding an ti i nihin tiang umnak nawl an pe hna lo tiah kan theih.

CNF/A cu 2015 October 15 ah Ramkomh Kawlram cozah le a dang tlangcung hriamtlai phu 7 (atu ah cun tlangcung hriamtlai phu 10) he Rampi Kahdaih Hnatlaknak (Nationwide Ceasefire Agreement) min an rak thut cang.

CNF/A cu cozah he kahdaihnak min an thut hnu in, Vanzangtlang, Zingpizingte, Tluangram ah phungning (official) tein in an um lio a si.#

Na ruahning rak langhter ve.. (Leave a comment)

%d bloggers like this: