Paletwa ah ‘High School’ pakhat hmanh an ong kho lo

0

TCP Hakha — Kawl Ralkap le AA kahdohnak ruang ah, Chin ramkulh Paletwa peng ah a ummi Siangsangrun (High School) an ong kho lo tiah theih a si.

“Paletwa ah Siangsangrun (high school) 25 fai a um. Nain, cachimtu an tlin lo ruang, cabuai thutdan tinzo lo ruang tlamtling in kan ngei lo caah sianginn pakhat hmanh kan ong kho lo” tiah Paletwa Education Dept (Ping-ngia-zi-hmu) lutlai Salai Aung Min nih a chim.

Ramkomh Kawlram chung ah a ummi siangsangrun pawl vialte 2020-2021 cacawn kum cu July 13 le 14 in an thawk cang. Nain, Paletwa ah a ummi Siangsangrun 16 le siangsangrun sinak caankar caah pek chungmi (sub-high school) 22 a ummi chung ah pakhat hmanh on khawh a si lo.

“Atu tiang Sianginn cu kan khar ko hna. A ruang cu khuami pawl vialte cu a him deuhnak hmunhma an tlik dih caah sianginn kan ong kho lo. Sianginn kan on lai ti hmanh u sihlaw, kan ong kho lai lo. A ruang cu sianginn thilri zeihmanh kan ngei tilo. A thar in kan herh dingmi a tam tuk” tiah Salai Aung Min nih a chim.

Ral ruang ah, Paletwa ah tuanvo a ngeimi sianginn cachimtu vialte cu an riantuannak ding hmunhma ah um ngam lo in an kir i, dinhnak le thialnak ca tampi an tial tiah theih a si.

Kawl Ralkap le AA kahdohnak ruang ah 2019 August tiang ah Sianginn 118 an khar cang tiah Chin Human Rights Organization (CHRO) cathanh ning in kan theih. #

About The Author

Na ruahning rak langhter ve.. (Leave a comment)

%d bloggers like this: