Paletwa Ah I Kahnak A Chuak I Cozah Lei Ralkap 20 Tluk An Thi I 30 Renglo Hma An Pu

0

The Chinland Post| 2018 November 19| Chin ramkulh Paletwa peng (India le Bangladesh) ramri, November 15 ah AA (Arakan Army) le cozah ralkap i kahnak a chuak i cozah lei ralkap minung 20 hrawng an thi i hliamhma pumi 30 hrawng an si tiah theih a si.

AA ralkap le cozah ralkap battalion 373 cu Kaladan tiva le Pyichaung karah a ummi Natchaungwa khua pawng Khan No.68 le 69 karah November 15 zanlei ah an i kap. I tukdohnak ruang ah ralkap 20 hrawng an thi i 30 renglo hliamhma an pu tiah Paletwa in AA ralkap lutlai pakhat nih a chim.
An i tuk caan hi November 15 chun suimilam 1:30 ah voikhat, suimilam 2:00 hnu ah voikhat le zan suimilam 9:00 ah voikhat tiin voithum tiang an i kap tiah AA ralkap in chimnak nawlngeitu U Khiang Thuh Khah nih a chim.

“November 15 chun i tukdohnak ah Aam hrambunh Khah-mah-yah 373 in ralkap 20 hrawng an thi. Cozah lei ralkap tampi an thi. Hiti a thimi cazin ka chim khawhmi cu ka mit in ka hmuhmi ka chim. Hliamhma an pu i an zaam, an meithal zong kan chuh hna” tiah U Khiang Thuh Khah nih a chim.

Hiti i tukdohnak a chuahnak a ruang cu cozah ralkap battalion 10 hrawng nih AA ralkap pawl an kan kah hmasa caah a si. A luancia November 13 ah cozah ralkap le AA ralkap karlak ah i kahnak a um i AA ralkap pakhat a thi i minung 4 hrawng hliamhma an pu ve” tiah a chimchih.

2017 November 8 hrawng Chin ramkulh Paletwa peng ah Arakan Army (AA ralkap) le Kawl ralkap i kahnak in Chin ngakchia pakhat le Kawl ralkap minung 17 an thi tiah theih a si.

Chin ramkulh, Paletwa ah peng ah khua a sami le zung hrampi chiah in khua a sami Arakan Army (AA) zungpi (zungchoh) cu Myanmar ralkap nih an laak khawh cang tiah The Voice thawngthanhca nih December 19 zingka ah a rak thanh.

Chin ramkulh chung ah Kawl ralkap le AA ralkap idohnak ruangah 2017 kum khan Chinmi minung 1750 leng cu Mizoram lei ah an rak zam.
Chin ramkulh thlanglei Paletwa peng Kuchaungphia khua cu AA ralkap (Arakan Army) nih an luh hnawh hna i mizapi an hrem hna caah khuami 60 renglo cu khua kiangkap Zinbawngpin khua lei ah May 18 ahkhan an zaam tiah kan theih.

Paletwa peng ah AA ralkap le acozah ralkap kar buainak le i kahnak ruang ah a hlan zong ah khuami a thong renglo India ram lei ah an zaam bal cang. Cu lio ah a rak zaammi Paletwa peng, Kungpin khuami 300 renglo cu nihin tiang an khua ah kir ngam ti lo in an zaam rih ko tiah theih a si.

Ref: BBC Burmese, Khonumthung News

About The Author

Na ruahning rak langhter ve.. (Leave a comment)

%d bloggers like this: