Paletwa ah ralzaam nu pahnih nih bom an i lam sual

0

The Chinland Post | 2022 June 22 – Chin ramkulh, Paletwa peng, June 20 ah ralzaam nu pahnih cu bom an i lam sual caah pakhat cu a nunnak thinphang a si tiah khuami hna nih RFA ah an chim.

An pahnih hi bawlung certual pawng ralzaam camp ah a ummi an si i Paletwa khua in meng 6 hrawng aa hlatnak Abaungtha khua pawngah meh an kawl lioah bom an i lam sual hi a si tiah ralzaam a bawmtu Ko Aung Nyi nih RFA ah a chim.

Kum 34 a simi Ma Win Khe hi a orhlei ke a bul i a mit khatlei a tlau caah a hma a fak tuk i Paletwa sizung in Rakhine peng ralkap sizung ah thlop ding in tuaktan a si i kum 50 a simi Daw Chit Khin bel cu hma tlawmpal te lawng a tuar caah Paletwa sizung ah thlopbul lio a si tiah Ko Aung Nyi nih a chim.

A luancia May 26 ah Abaungthar khua le Yukwa khua karlak ah SAC ralkap le AA karlak kahdohnak a chuak hnu in Abaungthar khua pawngkam ah kaphnih nih hmunhma an khuar i entainak a fak tiah theih a si.

Kaphnih kar entainak a fah caah bom zong hmanh a si i zei phu nih dah a hmanh ti zong a fiang in theih a si lo tiah khuami hna nih an chim.

A luancia May 29 ah Paletwa peng Ngachia khuami pakhat cu bom lam ruangah hma a rak bu bel cang.

About The Author

Na ruahning rak langhter ve.. (Leave a comment)

%d bloggers like this: