Paletwa ah siahngakchia pawl an i citmi tilawng SAC ralkap nih an kah, siahngakchia 2 an thi
The Chinland Post | 2022 August 3 – Chin ramkulh, Paletwa khua chungah siahngakchia pawl an i citmi tilawng pakhat cu SAC ralkap nih an kah caah siahngakchia 2 an thi i 2 nak tlawm lo an i hliam tiah thawwng theih a si.
Paletwa peng, Tungmawa khua Middle School ah sianginn a kai i tilawng in a ṭin ṭhanmi Yimawa khuate siahngakchia pawl an i citmi tilawng cu Manuta khuate tiva kam ah hmunhma a khuarmi SAC ralkap nih an kah tiah khuami hna nih The Irrawaddy Burmese ah an chim.
“Siahngakchia pawl an i tel an hmuh ko buin maw an kah, zeiruang dah an kah cu kan thei lo. Siahngakchia 2 cu a hmun ah an thi colh, hliam a tuarmi pawl zong sizung an phan rih lo. Ralkap nih an kalter hna lo caah tilawng a kal kho rih lo” tiah Irrawaddy ah an chim.
SAC ralkap nih an kahmi tilawng cungah hin siahngakchia 10 nak tlawm lo an i tel i SAC ralkap tilawng mawngtu pa kha an check bantuk in tilawng zong an kalter rih lo” tiah khuami hna nih August 2 ah an rak chimchap.
Paletwa peng, Kinchaung khua le Tuthaykone khua telh in Hnamadaw khuate pawngkam ah SAC ralkap le AA cu zinglei in zaanlei sml 3:00pm tiang an i kap i Paletwa ah hram a bunhmi Infantry 289 nih kahdohnak hmunhma lei ah hriamngan an kah tiah thawng theih a si.
