Paletwa Ah Thilri Phorhnak Nawl Rikhiah A Si Peng Rih Ko
The Chinland Post | 2023 September 6 — Chin ramkulh, Paletwa peng ah thilri luhchuahnak lam cu SAC nih rikhiah mi a um rih ko caah thilri man a kai thluahmah tiah Western News nih a langhter.
Paletwa ah Arakan Army (AA) le SAC ralkap pawl karlak kahdohnak a fah lio ah SAC lei nih umkalnak nawl ri a khiah, thilri phorhnak lam pawl hna a rak phih i atutiang thilri phorhnak nawl cu rikhiah a si rih ko.
SAC nih ri a khiah mi chung ah facang telh in eidin cheukhat, datsi/diesel, inn saknak thilri le sii-ai hna an i tel i thilri phorh duh ahcun SAC ralkap theihpinak lawng in phorh khawh a si tiah Paletwa khuami nih Western News ah a chim.
Paletwa le Kyaukdaw karlah hi SAC tilawng a umkal lengmang i hmatphungṭin ngeih lawng ah umkal khawh a si fawn tiah a chim.
Atu bantuk in SAC ralkap nih ri an khiah mi a tam ruang ah Paletwa hi hmundang nak in thilman a kai khun i Pawsan hmuai (ပေါ်ဆန်းမွှေး) hi 120,000MMK a phan i facang leng ah datsi/diesel, eidin thilri man hna zong a kai khun tiah an chim.
SAC ralkap rikhiahnak pawl ruang ah Rakhine le Chin ramkulh ralzaam pawl telh in Mocha thlichia ruang ah harnak a tong mi pawl dinei awk leng ah an inn pawl zong an remh kho rih lo tiah Western News nih a langhter.
About The Author
