Paletwa khuachung ah puahnak faakpi a chuak; minung 3 an thi

Paletwa, Chin State

Paletwa khuachung ummi Myanmar Economic Bank (Myanmar sipuazi bank) le mucu sianginn kar ah puahnak nganpi (bomb maw a si, kuan ngan ti hliah a si rih lo) April 22, zanlei sml 4: 30 le 5: 00 karlak ah a chuak i minung 3 an thi i pakhat fakpi in aa hliam tiah thawng kan theih.

Hi kahnak a tuahtu hi khuami nih cun Kawl ralkap an si lai tiah an zumh.

A thimi pathum chung ah Bank ah rian a tuanmi U Kyaw Sua Htik i a fanu kum 4 ngakchia Nu Elizabeth Moe Moe Aung le a nupi Daw Ei Thandar, kum 9 ngakchia pa Mg Aung Naing Win an si. A thimi ngakchia pa hi a nu Daw Mya Lay Nwe Rakhine miphun a si i Bank ah rian a tuanmi a si ve.

Aa hliammi hi Pu Aung Law Kee (Mindat khuami) a si i a paw ah hma a pu (thin phang um lo) i siizung ah lakhrual in aa thlop lio a si.

Kum 4 ngakchia nu cu a pum lak awk thalo in a choi dih. A nu zong alu a tan. Cun Kum 9 ngakchia pa zong a ke lawng a tang i a dang a pum cu a tlau dih. Bank ah rian a tuanmi Pu Aung Law Kee zong puahnak ruang ah a paw aa hliam i lakhruak in siizung ah an thlop liopi a si tiah Paletwa khuami in Pastor pakhat nih The Chinland Post ah a chim.

“Bomb a puahnak hmun ah keimah pumpak in ka kal i ka va zoh. Ka mit hrimhrim nih a hmuhmi a si. Lakhruak in siizung ah an thlopmi a zeidah a lawh ka thei lo. Phan awk um lo ti cu an chim. Siizung chung ah ka va lut ti lo. Paletwa pawng ah atu zong i kahnak meithal thawng kan thei cuahmah,” tiah Paletwa khuachung ummi Pastor pa nih cun a chim.

Paletwa peng ah AA le ralkap i kahnak ruang ah a luancia ni 30 chung ah Kawl ralkap vanlawng kahnak in Chin mi minung 29 an nunnak a liam i inn 50 renglo mei nih a kaang.

April 21 ah Rakhine ramkulh ah Covid-19 zawtnak chek awk a phormi Sittwe khua in Rangoon lei a kalmi WHO (World Health Organization) motor zong kah a tong i motor mawng a thi, a dang pakhat zong fakpi in aa hliam. Kawl ralkap nih AA nih kahmi a si tiah an thanh i AA nih ralkap kahmi a si tiah an i puh veve.

Na ruahning rak langhter ve.. (Leave a comment)

%d bloggers like this: