Paletwa Kiangkap Chin Ralzam 5000 Renglo Caah Chin Cozah Nih Facang Tun 200 A Bawmh
Salai Elvis| 2019 February 8| AA (Arakan Army) le Kawl ralkap ikahdohnak ruang ah thlanglei Chin ramkulh Paletwa kiangkap ralzam minung 5000 renglo cu Chin ramkulh cozah nih 2019 January 31 ah facang tun 200 bawmhnak a pek hna.
“Riantuantu dangdang hna nih bawmhmi le tangka thawhmi chungin Chin ramkulh cozah ai-awh in bawmhnak kan pek hna hi a si. Tutan cu facang lawng kan pek hna. A ruang cu rikhiahmi tiang lawng kal khawh a si caah thilri dangdang telh ti lo in facang lawng kan bawmh hna hi a si. Meeting kai pah le facang bawmhnak pek pah in January 31 ah, khuabawi hna thladih meeting an tuah pah in tuanvo ngeitu hna sin ah pekchanhnak ka ngeih hna. Hi lio caan ah ralzam dirhmun in a ummi hna an khuabawi te zong an ra dih i an sining kongkau zong ruahnak an kan ngeih i anmah sin lila ah pekchanhnak kan tuah” tiah bawmhnak pek ah a kalmi Sipin vuanci U Soe Htet nih The Chinland Post ah a chim.
Atu bantuk in Paletwa peng ralzam hna cu Chin ramkulh cozah nih a luancia December thla lio ah facang tun 17, Um, Kheng le thilpuan dangdang zong bawmhnak an rak pek bal cang hna tiah kan theih.
“Chin ramkulh cozah nih tuandeuh ah an rak bawmh ning hna cu ka hngal deuh lo i keimah ka riantuannak thla 8 chung ah hin December thla ah facang tun 17, bel le kheng tel in thilpuan tibantuk motor khat tein kan rak bawmh bal hna” tiah a chimchih.
Atu lio Paletwa peng kiangkap ah Chin miphun ralzam dirhmun in a ummi Rakhine ram lei Chin, Khami, Min-pia, Choh-taw, Pungna-cun vialte telh in innchungkhar 1,080 le minung 5,360 tluk an um i Paletwa peng chung lawngah inn chungkhar 600 le minung 3,000 leng an um tiah kan theih.
About The Author
