Paletwa Le Rakhine Ramkulh Chung I Kahnak Ngol Ding In Yangon Ah Duhnak An Langhter Lai
The Chinland Post| 2019 July 10| Chin ramkulh Paletwa peng le Yakhine ramkulh ah a cangmi AA ralkap le Myanmar ralkap kar i kahnak ngol ding in mizapi cawlcanghnak Yangon um Chin mizapi nih July 13 ah duhnak an langhter lai tiah theih a si.
Yangon um Chin mizapi nih July 13 zinglei suimilam 10:00, Aung San Stadium tual hmai le tlanglawng innpi hmai ah i ton in tawlreltu committee nih chuahmi vinyl, poster pawl i tlaih in lam kan zawh lai. Cun, Town Hall hmai Maha-Bandulah pangpar dum hmai ah biachimnak zong pehzulh in kan tuah lai tiah hruaitu pakhat a simi Salai Ceu Bik Thawng nih a chim.
Salai Ceu Bik Thawng nih, “Paletwa ah a ummi Chinmi le Yakhine ramkulh ah a ummi Chinmi zong ral a zammi 8000 tluk an si cang. Ral ruang ah harsatnak, sunghnak le hliamhma tuar le a thimi tibantuk a phunphun in nuhrin covo buarnak pawl a um. Cu ruang ah biapi a simi phu hnih AA ralkap le Myanmar ralkap karlak i kahnak ngol ding in duhnak kan langhter lai. Chin mizapi halnak au thawng hi tuanvo ngeitu phu hnih nih a biapi in zawnruahnak he an kan ngaihpiak lai in an kan tawlrelpiak ko lai ti kan i ruahchan. Cuti si lo in anmah nih mit an kan chinh khanh ahcun Chin mizapi nih ngaithiam kho lo in kaphnih caah a tha kho lai lo” tiah a chim.
A luancia caan zarh ahkhan AA ralkap nih tlaihmi Kintalin khuami chung in 12 an luat i atu AA ralkap sakhaan ah Kintalin khuami 39 an tang rih theih a si.
Ref: Chin World
About The Author
