Paletwa, Miza Khua Ah Ralkap Nih Bom An Thlak, Mipi 7 An I Hliam
The Chinland Post | 2023 November 21 — Chin ramkulh chaklei, Miza khua cu ralkap nih November 20 zaanlei ah vanlawng in bom a thlak caah mipi 7 an i hliam, cheukhat cu an hliam hma a fak ngai tiah theih a si.
“Ralkap nih bom a thlaknak hmunhma ah kahdohnak zong a um lo. Bom a thlak caah mipi 7 an i hliam. Hliam a tuar mi chung in kum upa nu pakhat cu a hma a fak ngai. A nunnak a liam kho” tiah khuami pakhat nih November 20 ah Khonumthung Burmese ah a chim.
November 20 zaanlei ah Paletwa peng, Ta-ron-ai khua chaklei in meng 6 aa hlatnak Miza khua cu ralkap nih vanlei in bom an thlak i mipi pawl nih sii an bawmh ko hna nain a zual deuh mi cheukhat hi sii bawmhnak an herh ngai tiah theih a si.
Ta-ron-ai khua pawng ah ralkap le AA karlak ah kahdohnak a chuah hi ni 4 hrawng a rau cang nain atutan hi kahdohnak um lo in ral an zaamnak khuate ah vanlei in kahdohnak a tuah hi a si tiah khuami hna nih an chim.
AA nih Rakhine ram le Chin ramkulh, Paletwa peng ah ralkap sakhaan cu November zarhhnihnak thawk in kahdohnak an thawk hnu ah kaphnih karlak kahdohnak a fak.
About The Author
