Paletwa peng ah AA le SAC ralkap karlak ah kahdohnak a chuak
The Chinland Post | 2022 July 25 – Chin ramkulh, Paletwa peng, Abaungtha khua pawngah SAC ralkap le AA cu July 24 zinglei sml 10:00am hrawngah an i kap tiah theih a si.
Yaukwa tiva a tawlei Abaungtha khua pawngah SAC ralkap nih sakhaan pakhat an chiah i cuka sakhaan ah eidin phorh ding in a kalmi SAC ralkap mawṭaw AA nih an kah caah kaphnih karlak kahdohnak a chuah hi a si tiah theih a si.
A luancia May 26, Abaungtha khua pawng sakhaan ah thazang chap ding in a kalmi SAC LIB 375 battalion le AA karlak ah kahdohnak a rak chuak i SAC ralkap a thimi an rak um.
May 15, Paletwa peng, Tantawng khua pawng zongah kaphnih kar kahdohnak 20mins tluk a rak chuak.
SAC ralkap le AA karlak ah entainak a fak i July 18 zongah Maungdaw chaklei ah kahdohnak a rak chuak. Kahdohnak chungah BGF 14 AA nih an rak tlaih hna i SAC ralkap a thimi an tam.
