Paletwa peng ah CDF le AA karlak ah entainak a um lo tiah an thanh

The Chinland Post | 2022 September 15 – Chin ramkulh, Paletwa peng chungah CDF le AA karlak ah entainak a um lo tiah CDF-Paletwa nih a thanh.

“Kan zapi in hramhram uknak a dohtu phu lawngte kan si ko” tiah CDF-Paletwa nih September 14 ah a thanh.

CDF-Paletwa he pehtlai in online cungah a hman lomi thawng an ṭialmi kong he pehtlai in fianhternak a tuahmi a si.

CDF-Paletwa hriamtlai pawl AA sin ah raltuk cawnnak an ngei tiah Chin holh in an ṭialmi, kawl holh in an leh chinmi pawl kha Facebook page ah an kan hmuh i Paletwa peng, Tantaung ah CDF-Paletwa le AA karlak ah entainak a chuak tiah an ṭialmi kha kan rel caah cu bantuk thawng pawl cu a diklomi a si tiah a fianh.

“CDF-Paletwa cu AA sin ah raltuk a cawng lo. Hmailei zongah a cawng lai lo. CDF-Paletwa cu CJDC chungtel a si caah CDF-Paletwa nih raltuk a cawn khawhnak hmunhma a um tuk ko” tiah a thanh.

Tantaung hmunhma telh in Paletwa peng chungah CDF le AA karlah ah entainak a um lo i CDF-Paletwa cungah theihthiamnak a pial sualnak hnga lo a dik lomi caṭialnak pawl kha i ralring cu tiah theihthernak a tuah.

Na ruahning rak langhter ve.. (Leave a comment)

%d bloggers like this: