Paletwa Peng Ah Meithal Kahnak In Minung Pakhat A Thi
Salai CungCung|2019 March 20| Chin ramkulh Paletwa peng Kaladan tiva cunglei Turawine khua um pa pakhat cu March 19 zanlei ah Rakhine ramkulh Kyauktaw lei a kal pah ah meithal kahnak in a thi tiah kan theih.
A thimi pa hi U Aung Kyaw Nyunt kum 50 a si i Rakhine ralkap AA nih meithal in an kah tiah Khumi Media Editor Ko Peter nih a chim.
“U Aung Kya Nyunt hi Rakhine mi a si i a nupi hi Khumi a si. A fanu hi kawl ralbawi nupi a si. A mah hi AA pawl thazaang a pe lo ngaimi a si caah AA lei nih an an ngiat ziar cangmi a si. Amah hi Rakhine ramkulh Kyauktaw a um lio March 19 zanlei ah khan meithal in an kah hi a si” tiah a chim.
U Aung Kyaw Nyunt hi chungkhar he khuasa mi a si i Turawine khua ah a ummi a si. Zeitindah AA he an i pehtlai ti cu fiang in theih a si lo.
AA rakap nih February 22 ah Paletwa peng Taan-taung khua ah khuabawi le palek bawi pakhat cu kawl ralkap sin ah thawng nan thanh tiin an tlaih hna i zarkhat hnu ah an thlah than hna. March 15 Paletwa Kaladan tiva hlei saknak caah thilri a rak phortu tilawng pakhat zong an kah rih tiah kan theih.
Ref: Khonumthung
About The Author
