Paletwa Peng Ah Pehzulh In Bomb Kah Thawng An Theih Caah Khuami 200 Leng An Zaam

0

Salai CungCung|2019 August 9| Chin ramkulh Paletwa peng Baungwa khua pawng ah pehzulh in bomb kah thawng an theih peng rih caah khuami hna cu an mah le khua ah um ngam ti lo in hmunhimnak ah minung 200 leng August 6 ah an zaam hna tiah kan theih.

August 5 thawk in Baungwa khua pawng ah bomb kah thawng cu pehzulh in an theih peng caah Kawl ralkap le AA hriamtlai kar kahdohnak a fak chin chin sual lai thinphan in Baungwa khua in chungkhar 37- a minung in 204 cu Auahtemawa khua ah an zaam tiah khuami pakhat nih a chim.

“Bomb kah thawng cu Rakhine ramkulh lei in a si, kan mah he cun aa naih pah ko nain cu tluk naih cu a si lo. An chim ning ah cun Auhtemawa khua lei ah hin Kawl ralkap an um, cun AA hriamtlai pawl zong Baungwa khua a cunglei i an um ve tikah kahdohnak faktuk in a chuak lai ti an phan caah an rak zaamnak hi a si” tiah  Auhtemawa khuami pakhat nih a chim.

Hi Baungwa khua cu Rakhine ramkulh lei ah a ummi a si i inndong 90, minung in 400 leng umnak khua pakhat a si. Baungwa khua chaklei ah hin AA hriamtlai umnak hmun pakhat a um i Kawl ralkap he fak tuk in kahdohnak a chuah sual ah cun ti thinphang in an um caah tubantuk in khuami cheukhat an zaamnak cu a si tiah kan theih.

Auhtemawa khua ah a rak zaam mi hna Baungwa khuami cu anmah le chungkhat sin ah chikkhat an um chung hna i a cheu cu sianginn hall ah an um tiah kan theih.

June 16 ah Baungwa khuami mino upa pakhat le khuami 3 zong AA hriamtlai nih an rak tlaih hna i tu ni caan tiang an  thlah rih hna lo caah an nu le pa cu thinphang in an um. Cu an tlaihmi hna 4 cu AA lei nih an rak thlah than hna lai an ti nain nihin ni caan tiang an rak thlah rih hna lo tiah kan theih.

Kawl ralkap le AA hriamtlai pawl cu August 5 ah Paletwa peng Hnamada khua le Ahtetpi  khua ah fak ngai in kahdohnak a chuak. Cun Rakhine ramkulh  Minpia peng  zong ah tu lio hi fak ngai in kahdohnak a chuak peng rih ko tiah kan theih.

Ref: Khonumthung

About The Author

Na ruahning rak langhter ve.. (Leave a comment)

%d bloggers like this: