Paletwa Peng Ah Rakhine Mi Thilphur 41 An Tlaih Hna

Salai Bawi Lian Sang| TCP-Kalay | 2020 September 17 – Chin ramkulh Paletwa peng ah Rakhine miphun 41 cu AA thil an phorh piak hna tiah lunghrinhnak in Kawl Ralkap nih an tlaih hna tiah VOA Burmese nih a thanh.

“Paletwa peng chawhleh an phihnak hmun ah a kalmi Rakhine lei in a rami thilphur minung 41 Kawl Ralkap nih an lunghrinh hna caah an tlaih hna. Ralkap nih penguk cozah riantuantu le palek sin ah an ap hna” tiah Minister U Soe Htet nih a chim.

“Kyuaktaw le Paletwa karlak Tilam le Tlanglampi an khar chung nak hmun ah thliphurtu hna hi kan peng chung khuami cu an si. Ralzam an i dornak, ‘IDP Camp’ ah a ummi cheukhat zong an i tel. Thil phurh an kalnak lam ah Kawl Ralkap nih zaanlei sang ah an tlaih hna i cu an tlaihmi hna zong kan va ton hna” tiah a chim.

“Zaanlei 7:30 hrawng a si cang i Covid-19 pulrai runvennak he pehtlai in le kahdohnak ruang ah chuahmi zulhphung Pohmah 144 nawl an chuahnak hmun a si. Zingka 6:00 in zanlei 6:00 karlak lawng chawhleh a ngahnak hmun a si. Ralkap nih bia an hal hnu nawlngeitu sin ah an ap hna i a herhning in hmalak (azizut) ding in an tawlrel” tiah Minister Soe Htet nih a chim chih.

Kan hnulei September 9 ni ahkhan Kawl Ralkap nih thilphormi 41 cu an rak tlaih cang hna. Penguk lei nawlchuahmi zulh lo ruangah Upadi (pohmah) 188 in (zizutnak) tuah khawh ding in biahalnak kan tuahmi hna an si tiah  September 15 ni ralkap nih thawngzamhnak an chim.

“Kawl Ralkap nih thilphur mi 41 hi Rakhine hriamtlai AA caah thil an phorh piak hna ruangah kan zumh hna lonak hi a si. Cu ruang ah tlaih le biahalnak kan tuah hna a si” tiah Ralkap Chimnak nawlngeitu General Zaw Min Tun nih a chim.

Paletwa peng ah Kawl Ralkap le Rakhine hriamtlai AA karlak raldohnak ruang ah Tilam, Tlang Lampi an khar i eidin an har caah khuami a phorh in an phorh. Cu thilphurtu hna nih Rakhine ramkulh in ram lak in thil an phorh theo. Cuchung in an tlaihmi hna thilphur minung 41 cu Covid-19 hrik an ngei le ngei lo an check lio a si caah a dangte in kan um ter hna tiah Paletwa ngandamnak zung riantuan nih a chim.

Atulio Paletwa peng chung kahdohnak ruang Rakhine Kyuaktaw lei kalnak Kaladan Tilam an khar hi February 2020 in a si cang. Cucaah, lam dang hman tawnmi Paletwa, Sami in Matupi lei kalnak tlang lampi zong an khar chung caah eidin harsa ngai in an um i thilman a fak ngai tiah theih a si.

United Nations High Commissioner for Human Rights (OHCHR) zong nih a chuahpi mi report chung ah, 2020 April 7 ah Kawl Ralkap nih vanlawng hmang in Paletwa a kahnak ruang ah Chin miphun in minung 7 an thihnak le minung 7 hliamhma an tuarnak kong siseh, inn 8 a kanghnak kong le khuami vialte an tlikzamnak kong zong an telh.

Cun, 2020 thawk in thla 5 chung ah, Chin le Rakhine ramkulh ah nu le ngakchia telh in 137 an thi i, 386 hliamhma an tuar. Hi chung ah a thimi 25 cu Rohingya an si i, a dang cu Chin le Rakhine an si tiah UN OHCHR report nih a thanh.

United Nations (UN) nih a voi 45nk caanhman tonpumnak an tuah lio mi 2020 September 14-October 2 kar Ramkomh Kawlram kong chimrelnak le caihhmainak an ngei. A hlei in, Rohingya Muslim le tlangcung miphun hna nih tonmi nuhrin covo buarnak kong ah United Nations High Commissioner for Human Rights (OHCHR) nih Office of the High Commissioner le Secretary-General sin ah cahmai 15 tluk a saumi report an chuahpi.

UN tonpumnak ah OHCHR nih Ramkomh Kawlram sin ah a tuah dingmi ah telmi cu kahdaihnak tuah colh i, Chin le Rakhine ramkulh ah a cangmi covo buarnak kong ah hlathlainak tuah in vawleicung zulhphung tang ah chuahpi in hmalaknak (zizutnak) tuah ding tiah a ti.

Hi report ah a bik in Rohingya nih an tonmi harnak le covo buarnak kong an langter. Cun, Chin miphun nih AA le Kawl Ralkap kahdohnak ruang ah hartonnak le covo buarnak zong tampi an telh.#

Cc; VOA Burmese

Na ruahning rak langhter ve.. (Leave a comment)

%d bloggers like this: