Paletwa peng kahdohnak ah SAC ralkap 8 an thi, CNA ralkap pakhat a nunnak a liam
The Chinland Post | 2022 March 14 – Paletwa peng, Lailaingpi khua htebwe sakhaan ah thazang chap dingin a rak kaimi ralhrang thazang 150 hrawng cu 2022 March 12 ah Skiha khua pawngah CDF-Paletwa nih bom an puah hnawh hna caah SAC ralkap 1 a thi, 5 leng an i hliam tiah Chinland Defense Force-Paletwa (CDF-Paletwa) nih March 14 ah a thanh.
CDF-Paletwa, CDF-Matupi le CNA phufonh hna nih March 13 zing sml 9:00-11:00am tiang voikhat, zaanlei sml 3:00-5:00pm tiang voikhat, a zapi te voihnih an kah hna caah SAC ralkap 7 nak tlawm lo an thi i 10 leng an i hliam.
CDF-Paletwa in mipi hriamtlai pakhat aa hliam, CNA ralkap 1 nih ram caah a nunnak a pek tiah theih a si.
SAC ralkap pawl nih Htebwe sakhaan luhnak lam cu an phih dih. Hriamngan in kah thlorh an kah caah Twesawkone khua inn pakhat, cachimnak khaan pakhat le khrihfa biakinn pakhat a khen caah a rawk.
Mipi hna khawndennak um lo tein himnak hmun ah an i ṭhial manh tiah CDF-Paletwa nih March 14 ah cathanh a chuak.
About The Author
