Paletwa Peng Laymyo Dam Dil Timhmi Khuami Nih An Duh Lo

Salai Elvis| 2019 January 17| Chin ramchung Paletwa ram chaklei Laymyo Tivapi cu Chin ramkulh cozah nih Dam (tidil) tuah dingin timhtuahnak an ngeihmi cu khuami hna nih an duh lo tiah theih a si.

December 24 ni ah khua mi, minung 90 nih Tidil an timhnak hmun ah cun kal in “Laymyo tivapi cu zungzal hmun in luang camcin ko seh” timi catar i ken in an duh lo nak an rak langhter. Ti an dilnak ding hmun cu Rakhine ramchung Tann-thaung khuate lei in khan (meng) 5 tluk aa hlatnak hmun ah a si i a tu lio ah France ram thiamsang hna nih hlathlainak an tuah lio a si tiah kan theih.

“Laymyo tivapi cu tiva pawngkam a ummi, khuakip mizapi an i chawhlehnak lampi a si bantuk in nifatin eipaw cawmnak caah a phihkharpiak tu tiva pakhat zong a si fawn. Kan mah lei ah hin motor lam zong a um lo caah hi tivapi hi kan i bochan ngaimi kan lam pakhat a si. Tiva kam ummi Ruakung, thingkung le Nga hna cu Rakhine ram ah kan zuar tawn hna pin ah thingkung zong pawcawmnak caah kan zuar in kan aah tawn hna. Hi tiva an kham ah cun a pawngkam khuami hna umnak an thial hna lai ti kan phang” tiah tiva kongkau humhak tu lutlai Saya Bo Lwin nih a chim.

Laymyo tiva kam ah khua a sami Chinram le Rakhine ram tiang ah khua te, khua 60 leng a um i minung 10,000 leng an um hna. Hi kong he pehtlai in Chin ramkulh Sipin Minister U Soe Htet nih, “hi tidil ah hin mei tha (600 Mgwat) a chuak kho lai i zeitik rian kan thok lai a fiang rih lo” tiah a chim.

Laymyo tivapi dil ding kongah khuami hna he i ceihmaitinak zong zeihmanh a um lo pin ah zeibantuk rian paoh va si seh hi rian cu an tuan kho lo tiah khuami nih December 24 ni ah ca thanh an chuah.
Ref: Mizzima

Na ruahning rak langhter ve.. (Leave a comment)

%d bloggers like this: