Paletwa Peng Siangcachimtu Ding Ah Tanghra Awnglo Zong Rian Pek An Si Lai

City Hunter| 2018 June 28| Paletwa peng chung ah siangcachimtu ding saya/mah tampi an chambau ruang ah tanghra awnglomi zong cachimh rian soktu paoh rian pek dih an si lai. A bik in anmah Paletwa peng chungmi kha tanghra awng lo an si zong ah papek in rian pek an si lai tiah kan theih.

Hi kong he pehtlai in Hakha NLD party in thawngthanhnak lei tuanvo ngeitu Pu Biak Kung nih, “June 27 kha Chin ramkulh NLD party chairman Pu Zo Bawi nih conference a kainak kong chimhfiannak a kan ngeih. Cu ahcun Paletwa peng nih siangcachimtu ding saya/mah tampi an herh. Anmah Paletwa peng chung in siangcachimtu a soktu paoh tanghra awng lo zong rian pek dih an si lai. Anmah Paletwa peng nih a zawh hna lo ahcun peng dang in tanghra awng lo zong rian pek an si ve te lai a kan ti” tiah The Chinland Post ah a chim.

Hi kong he pehtlai in Chin ramkulh hluttaw Speaker Pu Zo Bawi nih, “Paletwa peng hi Chin ramkulh pengkip ah tanghra result chia bik a si lawng si lo in siangcachimtu hi a thong dengmang an herh rih. Cucaah, tanghra awng le degree laciami lawng si lo in tanghra awng lo zong rian a soktu paoh rian kan pek dih hna lai. Anmah pengmi kha papek an si lai I anmah peng chungmi nih a zawhphak lo ahcun peng dang mi zong rian an pek an si te lai. Atu hi rian an auh cuahmah cang caah sok khawh a si” tiah The Chinland Post ah a chim.

“Kanmah NLD party chung in party zulhphung, phungphai le party biathli a phuangtu paoh a herh ning in tandat an si cang lai a kan ti. Cu lawng si lo in Chin ramkulh pengkip ah NLD party in mino bu committee ser ding zong a kan chimh. Atu hi Hakha khuapi chung sangkip in kan thawk cuahmah cang. Sangkip a dih in khuate ah kan tuah lai, khuate a dih in Peng dirhmun in committee kan ser than lai. Pengkip committee ser a si dih hnu ah ramkulh dirhmun zong in mino committee ser an si te ve lai. Nu committee hi cu pengkip le ramkulh dirhmun in an i ser dih cang caah mino lawng a taang cang” tiah Pu Biak Kung nih cun a biapeh ah a chimchih.

Na ruahning rak langhter ve.. (Leave a comment)

%d bloggers like this: