Paletwa Ralzaam Bawmhnak Caah CNF Le ICRC Tonnak An Ngei

0

Salai CungCung|2019 April 3|

Chin ramkulh Paletwa peng ralzaam bawmh khawhnak caah ICRC le CNF cu March 29 ah tonnak an ngei tiah kan theih.

ICRC lei in Mr.Stephan Sakalian (Resident Representative) le U Moe Myint Aung (Law and Policy Adviser) cu Yangon JMC office ah CNF Secretary-1 Dr. Sui Khar he tonbiaruahnak an ngei i Paletwa ralzaam bawmhnak kong ceihkhannak an ngei.

“ICRC hi hmundang harnak a tongmi hmun tamdeuh ah zung an hun i rian an tuan, Chin ramkulh ah cun an um rih lo. Cucaah anmah hi Chin ramkulh lei ah rian an tuan khawh nakhnga timhtuahnak kan ngei. Zeiti rian kan tuan ahdah santlaibik a si lai timi tonbiaruahnak kan ngei” tiah Dr. Sui Khar nih a chim.

Kawl ralkap le AA kar kahdohnak hi a fah chin lengmang caah Chin ramkulh Paletwa peng ah hin ICRC  lei nih zung hung hna sehlaw, harnak tonmi bawmhnak, bomb lei ralrin peknak cawnpiaknak zong ngeih hna sehlaw, Paletwa peng hi khualtlawn tikah Ti lam tam deuh kal a si  caah ICRC nih Ti leikam i runvennak tuahmi khuallam tuahpiak hna seh tiin CNF in minung pakhat nih ruahnak a cheuh hna tiah Dr. Sui Khar nih a chim.

“Paletwa peng ICRC nih zung an hun ah cun ralzaam caah bawmhnak tampi an pek khawh hna lai, cun an herh mi sii-ai pawl zong an bawmh khawh hna lai. Hi kahdohnak chung in mizapi an tlaihmi zong an chuah hna lai an khamh khawh hna lai” tiah CNF lei in bawi pakhat nih a chim.

Paletwa peng ah 2015 thawk in kawl ralkap le AA kar kahdohnak cu tu ni caan tiang a si i minung 1000 leng cu mah le inn le lo, khua chuahtak in an zaam tiah kan theih.

Ref:Khonumthung

About The Author

Na ruahning rak langhter ve.. (Leave a comment)

%d bloggers like this: