Paletwa Ralzaam Pum Tlamtlinglo Nu A Tlaihhremtu Cu Upadi Ningin Dan An Peknak Lai Chin Zatlang Bu(12)Nih An Hal

Salai David| TCP-Hakha| November 2, 2020| Chinram Paletwa Peng Sami ralzaam sakhan i aa dor lio mi kum(23) ralzaam mitlamtlinlo nu a tlaihhremtu Upadi ningin dan an peknak lai Chin Zatlang Bu(12)nih Paletwa Peng Biaceih Bawi le Sihni pawl sin ah an hal.

Ohtemawah khua pum tlamtlinglo nu ralzaam sakhan ah a um timi Kum(40)hrawng Palek pa (Rakhine mi) nih a tlaihhremnak kongah Chin phungphai (Chin Act) bantuk in i ngaihthiam lo dingin le Upadi ningin dan an peknak lai kan hal hna nak asi tiah Sami Nu Bu Phu in Pi Pui Pui nih a chim.

“Kanmah nih cun tlukruannak um seh ti kan duh tlaihhrem a tongmi hi mi sawhsawh asi lo Tuaktan khawhnak lei ah a chambaumi mitlamtling lo a si. Tlukruannak kan duh caah zatlang Bu (12) kan zate lungtlinnak in ca kan kuat hna nak a si. Hithil a tuahtu hi kanmah nih cun dan kan pek piak hna seh ti kan duh, daitlang phun in an um lai tizong kan phang. Kanmah Nu lei in cun Chinram Nu zatlang bu nih tinak nak in tlaihhrem a tongtu nih a duh ning tu in siseh ti kan duh. Tlaihhrem a tongmi nih a duhning ahcun hi thil atuahtu hi thongtla seh ti ka duh, amah he aa tlakmi dantatnak zong tuah hna seh ti ka duh ati caah kanmah zong nih aduhning kha pa kan pek” tiah Sami Nu Bu hruaitu Pi Pui Pui nih a chim.

Hi tleihhrem a tongmi mitlamtling lo nu hi nule pa ngeiti lomi a si caah a pu le sin ah aum mi si tiah kan theih. Hi kong he pehtlai in apu nih Ks 500000 in aa kan nawlpek ahcun ngaihthiamnak a um kho tbk hna a chim caah ngaihthiamnak um loin Upadi ning in dan an peknak lai kan halnak hna asi tiah Pi Pui Pui nih achim.

Apu nih Ks 500,000 in aa kan nawlpat ahcun ngaihthiamnak a um kho ati mi hi i tlukruannak kan hmuh khawh deuhnak dingah donkhaantu zong a si. Tlangtar ah Chinmi kan phunphai tiin kan hman tawnmi zong hi Chin nu hna cungah tlukruannak a zortertu asi tiah zatlang Bu (12) i an ca zongah an langhter. Upadi ningin kan tawlrel piak u tiin Eden Disabled Center, Hakhathar Nubu, Disabled Women Organization, Rezua Women Organization, Sakta Women Organization, Chin Women Organization (Hakha,), Daidinpar (Falam), Indigenous Women Network, Chin Family Group, Shine Di ၊ BOOM Women le Rathehtaung Youth Network hna nih an hal hna tiah theih a si. Ref: Khonumtung