Paletwa Ralzam Eidin le Innsaknak Bawmhnak A Herh Peng Rih

Paletwa IDPs/RRCCI

TCP-Hakha| 2020 May 20| 2015 kum in nihin tiang Chin ramkulh Paletwa pengah Kawl ralkap le Arakan Army (AA) ral dohnak ruangah Chin ralzam tampi an um lengah ralruangah leng a chuak kho lomi Paletwa mizapi caah eidin facang le ralzam hna dornak thlam asilo ah innsaknak caah herhbau a tam ngai rih tiah theih a si.

Paletwa peng chungah ralzam inndong (1600), Ralzam minung 9000 leng an um caah fur a tlak hlan ah eidin, sianginn, biakinn le dorchungnak thlam tbk herhbau izalhnak caah bawmchannak an herh khunnak hi a si. Paletwa peng ralzam inndong 1600 chungah inndong 960 fai lawng bawmchannak pek khawh rih a si.

Paletwa ralzam bawmchannak cohlang ding le bawmh kho dingin Chin ramkulh dirhmi Paletwa IDPs bawmchantu phu, Yangon um Relief and Rehabilitation Committee for Chin IDPs-RRCCI, Paletwa Baptist Association, CNF nih dirhmi Chin IDPs Support Committee le peng cheukhat ah dirhmi tbk zong an um.  Yangon RRCCI nihcun Paletwa ralzam caah bawmhnak an cohlanmi Kawlram Ks. 100,267, 600 (sing thongkhat leng) kan ngah cang tiah May 20 ah thawng an thanh.

Inn le lo kongah Chin Ramkulh Minister Soe Htet nih “Caan karlak dornak ca tiin plastic thlam kan rak sakpiak hna. Ngandamnak kong le thutdirnak kongah an iharh deuh caah rua in pe 10×12 isa chunh tuah seh kan ti i hlawh a tling ngai. Cucaah Rua in inn 600 leng sak ding timtuahnak kan ngei. Cu saknak caah innkhat Ks.200,000 ret in a kan bawm kho tu ding an um ahcun kan ilawmtuk hnga. Ramchung ramleng Chin unau, Biaknak lei, zatlang phu le Company pawl nih bawmh kan herh ngai ko” tiah The Chinland Post ZOOM biaruahnak ah a chim.

Hi bawmhchannak hi Yangon RRCCI asilo ah Chin ramkulh Cozah sinin pek khawh a si. Cozah lei in a lutmi paoh cu Paletwa ah Bawmchanhnak a lutmi paoh a cohlang tu committee tengnge a um i felfai tein cazin record kan chiah. Kan mah lei zongin cohlan lunglawmhnak ca zong kan tuahpiak hna. Chin ramkulh Cozah Kokek Puicim Tawlrelnak Committee (National Disaster Management Committee) budget chungin sing 2400 (ramkomh sing 1200, ramkulh-1200) hman ding zong tawlrel a si.  Cu pekmi in cun palastic thlam pe 100 x pe 30 inn 48 zong Sami, Miza ahcun sak kan tim rih tiah a chim.

Paletwa IDPs bawmchannak an herhnak kong he pehtlai in May 17, 2020 RRCCI biathanhning ah Paletwa peng chung Paletwa khuapi inndong 1132, milu 5090 (pa 2337, nu 275), Sami inndong  698, milu 2961 (pa 1387, nu 1574), Miza inndong 605, milu 2022 le Seinsing khua ah inndong 39 le milu 199 an um. Paletwa ralzam lawng silo in Rakhine ramkulh Ralzam he milu 18123 leng an si tiah an langhter.

Sami tiang cu Matupi in Facang, eidin le a herhmi thil kuat khawh a si ko nain Sami in meng 40 ahlatnak Paletwa bel cu April 19 ni ah Facang tun 830, Chin ramkulh Cozah kuatmi facang tun 2000, WFP nih kuatmi Facang tun 1000 a zapi tun (3830) lawng a phak khawh rih caah Paletwa khua pawngkam khua pawl minung thongkul leng an har sa ngaingai. Paletwa peng ahhin milu singkhat leng um a si i ral a umnak ah minung 60,000 faitluk khua an sa. Cuchung ah minung 20,000 cu eidin tirawl a um ti lo caah bawmhchan kan herh ngai rih ko tiah an langhter.

Rakhine Khualipi Sittwe ah Facang tun 4390, Sami ah Facang 5665 a phan cangmi a um nain Paletwa lei kuat khawh a si rihlo tiah theih a si.

 

 

Na ruahning rak langhter ve.. (Leave a comment)

%d bloggers like this: