Paletwa um Bawm Unau Thantlang Peng Tikir Thial Timh

Tikir Thar, Thantlang Peng by The Chinland Post

The Chinland Post Hakha| 2019 November 4| Paletwa peng Kawl Cozah ralkap le Rakhine hriamtlai AA pawl kahdoh ruangah Paletwa ralzam Bawm unau pawl cu Thantlang peng Tikir khua ah inndong (20) hrawng thial an timh tiah theih a si.

Hi kong he pehtlai in “ Kan hnu thla ahkhan umhmun khuar le thialkamnak kongah an khuabawi le rianngei upa hna Tikir an kan tlawng. Lunglawm tein khuami nih kan cohlan hna. Cozah lei Natala zong nih an umnak caah arannak in inn 20 an sakpiak hna. Dong 20 leng zong kan si kho an ti caah inn kan ngeihciami zong ready in kan chiahpiak ko hna. Kan theihning ah November thla thok ah rat dawh an si i. a herhmi Cozah lei in kalumnak cu an tuahpiak hna lai tiah thawn kan theih” tiin Tikir khua upa Pu Lal Kio nih The Chinland Post ah chim.

Hi kong he pehtlai in Paletwa Miza ralzam camp um Bawm pawl pehtlainak kan tuah kho rih hna lo.

Hi kong he pehtlai in Paletwa Bawm pawl nih Tikir um kan duh an ti caah Paletwa Miza Ralzam umnak hmun in Tikir thialding timhtuahnak kan ngeihpiak cang hna tiah October 31, 2019 Media le Cozah tonnak ah Vuanci Soe Thet nih a chim.

Tikir khua cu Khua pawngkam inndong 30 fai nih an panh bal cang hna I Paletwa lei a rami he cun inndong 50 an si cang lai tiah khuami sin in theih a si.

Tikir Thar cu Thantlang peng Thantlang-Thlualam-Hrangkhan-Tikir meng 30 fai a hlami inndong 130 fai a ummi khua pakhat a si. Tikhir khuahlun ah inndong 55 fai an um tiah theih a si. Rakhine hriamtlai AA ruangah Paletwa Miza Camp pakhat lawngah ralzam minung (600) leng an um tiah theih a si. +++

 

Leave a Commnet

%d bloggers like this: