Paletwa Um Ralkap Byu-ha Sakhaan 2 AA Nih A Kah Cuahmah
The Chinland Post | 2023 November 14 — Chin ramkulh, Paletwa ah hrambunh mi ralkap Ta-run-ai byuha le Nung-bu byuha sakhaan 2 cu AA nih a kah cuahmah lio a si tiah unau hawikom phu nih thawng an thanh.
Ralkap lei nih vanlawng, hriamngan hna bawm in a kham chih ve ko nain AA ralkap pawl nih ngol lo in an kah thluahmah tiah an langhter.
Operation 1027 min in AA nih Rakine ram ah a um mi ralkap sakhaan cu November 13 thawk in kahdohnak a tuah.
November 13 kahdohnak ah Rathedaung, Maungdaw le Minbya peng hmun 5 ah kahdohnak a chuak i Rathedaung peng ah a um mi Dung-paih BGF sakhaan le Ching-kha-li BGF sakhaan hna an lak khawh.
Minbya peng chung kahdohnak ah ralkap IB 344 in Major Thant Zin Htun (S.B.C) Captain Phyo Zeyar Hliang hna telh in 10 an tlaih khawh hna tiah AA nih a thanh.
Kahdohnak chung ah mithmuh in 10 leng an i hliam tiah an chim.
Cun ralkap LIB 232 he a cang mi Maungdaw chaklei, Tinbaw khua pawng kahdohnak zong ah ralkap pakhat telh in ralkap hriam le kahdohnak thilri pawl an lak khawh i Platoon Leader Kyaw Thet Naing telh in 14 hrawng an thi.
November 13 kahdohnak ah AA lei 6 an nunnak a liam tiah an langhter.
November 13 ah palek A pauk-wa sakhaan in palek 22 AA sin ah an i fonh tiah an langhter fawn.
Cun hmundang in palek 6 zong hriam he an rak i fonh ve tiah an chim.
November 13 lawng ah ralkap kuttang BGF, palek sakhaan 40 deng an kaltak i a pawngkam aa naihnak ralkap sakhaan, palek sakhaan pawl ah an i fonh tiah theihternak an tuah.
