Papun peng kahdohnak ah KNU battalion 5 Commander a nunnak a liam
The Chinland Post | 2022 April 30 – Karen ram, Papun district chungah SAC le KNLA karlak kahdohnak ah KNU battalion 5 Commander Colonel Nay Toe @ Saw Htoo Ka Shaw a nunnak a liam.
Papun ah hram a bunhmi SAC ralkap battalion 434 commander telh in thazang 20 hrawng a simi Kyaukhngiat sakhaan cu Karen National Liberation Army (KNLA) thazang 100 hrawng le (BPLA) Burma People’s Liberation Army (BPLA) phukomh hna nih an kah lio hna ah a nunnak a liam hi a si.
Kahdohnak hi sml 5 hrawng a rau i Colonel Saw Htoo Shaw cu khur cawhmi pawl a zohfel lioah kah a ton hi a si tiah KNU ransang a tlaimi pakhat nih a chim.
“Sakhaan hi ralkap 20 hrawng an um. Kan mah lei thazang 100 hrawng in kan luhhnawh hna. Zinglei 7:00am in chun 12:30pm tiang a rauh caah SAC ralkap pawl nih an celh ti lo. Hnu an kirtak. Kahdohnak a dih lai te ah khur cawhmi chung a lut i khur chung in pakhat a tangmi nih a or ah a kah i a thih colh hi a si” tiah a chim.
BPLA zong nih Kyaukhngiat sakhaan kahdohnak ah KNLA he i bawm in sakhaan kan lak khawh. Kahdohnak ah KNLA chungtel pakhat a nunnak a liam tiah a thanh ve.
BPLA hruaitu pakhat a simi biazai ṭialtthiam Mg Saung Khah nih Colonel Saw Htoo Shaw cu BPLA hi a fekmi le a ṭhawngmi ralkap siseh tiah a kan duhpiak. A nunnak a liammi hi dothlennak caah a fak tukmi le cham ṭhan awk a ṭha ti lomi sunghnak nganpi a si tiah a mah pumpak facebook cahmai ah a tar.
Ref: Irrawady Burmese