Party Mee Nan Pek Lo Caah Hmun 6 Ah Kan Sung; Dr. Myo Nyunt

Hakha_TCP |2018 November 5| 2018 caankarlak thimnak ah NLD party nih hmun 6 ah thimnak an sungh hi NLD party dirkamhtu pawl nih mee nan pek lo caah a si tiah NLD party chimphuannak nawl ngei tu Dr. Myo Nyunt nih a chim.

Tutan caankarlak thimnak i NLD an sunghnak pawl cu Matupi, Yatehtawng, Tamu, Lechia, Myitgyina le Yangon ramthen Saihkaan ah an si.

“Caankarlak thimnak mee peknak ah hin NLD party dirkamhtu tamdeuh pawl nih mee an rak pe lo ti kan hmuh” tiah Dr. Myo Nyunt nih a chim.

Novemner 3 tuah mi caan karlak thimnak hmun 13 chung ah NLD nih hmun 7 ah teinak an hmuh i USDP nih hmun 3 teinak an hmuh. Yatehtaung ah Dr. Aye Maung fapa pumpak in aa zuammi U Tin Maung Win nih teinak a hmuh. Lechia peng ah SNLD party nih teinak an hmuh. Aa zuammi palai zapi hi 69 an si i mee pe khotu zapi hi 900,000 an si. Hi chung ah hnarcheu tluk lawng nih mee an pek tiah theih a si.

Tlangcung mi nih NLD cozah a rian tuan ning hi an duh ning si lo caah le an ruah ning in thil a kal lo caah caankarlak thimnak ah hin NLD dirkamhtu tamdeuh nih mee an pek lo caah NLD a sungh ko rua tiin kan ruah tiah Dr. Myo Nyunt nih a chim.

“A ngaingai ah NLD nih kan tuah khawh lengpi in vote thlatu pawl nih a kan ruahchan. An i ruahchan bang in thil kan ti khawh lo tikah lungtlin lonak an ngei ko lai. Kannih zong nih atulio kan sining tein kan si khawh chung in tuan khawh kan i zuam rih ko lai,” tiah a chim chap.

“NLD cozah ah hin mizapi chawlehnak a har, rian zong a har, Ngunkhuai pek ding a tam. Rian ngei lo an tam. Cun Tlangcung mi kahdaihnak um lo in ralzaam an tam chin chin. NLD Cozah nih hi pawl hi tlawmter deuh nak a tuah khawh lo pin ah Tlangcung mi party pawl he chawhbiak ah USDP nak in a tha lo deuh. I funtomnak a tuah khawh lo caah tlangcung mi vote pek a tlawnnak hi a si” tiah ramkel lei thiam mi U Ye Tun nih a ruahnak a chim.
Ref: The Voice, RFA

Na ruahning rak langhter ve.. (Leave a comment)

%d bloggers like this: