Hakha Pastorte nih Ralkap hrenmi kong ah tonding an hal nain Monwya in Ralkap nih an cohlang lo: Ralkap nih HCMF an ton hna

Salai Tluangkipthang| 2021 February 18 — Remdaihnak ah rian a tuanmi Pastor te phu nih, Chin Peace & Tranquility Committee (CPTC) nih Ralkap nih tlaih mi le hren mi hna kongkau le a dangdang buaibainak a um chinnak hnga lo kong he pehtlai in siseh, cun thlacam piak ding in Ralkap sin ah nawl an hal nain Northwestern Command, Monywa nih an cohlang lo tiah kan theih.

CPTC in riantuantu pakhat nih, Feb. 10 ahkhan, Hakha hrambunh Ralkap Lutlai (Buihna Hmu), Ramri Runvennak Vuanci, Palek Lubuk sin ah Rung Tlang ah anmah he tonnak ngei ding in kan hal hna. Tonnak kan rak hal mi cu Feb. 11 ahkhan a si. Nain, a cunglei Monwya in tonnak kan hal mi hna cu an rak cohlang lo tiah an kan ti” tiah The Chinland Post ah a chim.

Atu bantukin, tonbiaruahnak ngeih ding in kan timhtuah nak a ruang cu, Ralkap nih an hren mi hna Thlacampiak, an dirhmun theih duh le a sining kong hlathlai duh ah a si ko. Asinain, tonnak an kan pek duh lo tik ah kan nih lei zeihmanh tuah chap khawh ding a um lo tiah a chimchap.

CPTC nih tonnak nawlhalmi a cohlan lo lio ah, atulio Ralkap nih a ser thar mi hruaitu hna, Pu Ngun San Aung telh in Hakha Christian Minister Fellowship (HCMF) cu Feb. 14 ah tonnak an hal hna i, Feb. 16 an tonnak an ngei tiah kan theih.

Ralkap uktu le HCMF an i tonnak kong he pehtlai in, mipi sin ah zeidah an caih timi bel thanhnak an tuah mi hmuh khawh a si rih lo.###