Pauk-Pakokku Lamcung SAC Ralkap Mawṭaw Pawl Kahdohnak Ah Ralkap Mawṭaw 10 A Rawk, Wetlet Kahdohnak Ah SAC Ralkap 7 An Thi
The Chinland Post | 2023 June 7 — Magway ramṭhen, Pauk peng in Pakokku lei ah riahcaw phor ding in a kal mi SAC ralkap mawṭaw le himnak a lakpiaktu Pyusawhtee pawl cu Drone in bom an thlak hnawh hna, bomrap an puah hnawh hna caah mawṭaw 10 hrawng a rawk tiah PPDF nih a thanh.
June 5 zaanlei sml 3:00pm hrawng ah Pauk khua in Pakokku khualei ah riahcaw phor ding in a kal mi SAC ralkap mawṭaw 30 hrawng le himnak a lakpiaktu Pyusawhtee pawl cu Pauk-Pakokku lamcung ah bomrap lung 7 le Inaka bomh lung 13 an puah hnawh hna tiah theih a si.
“Mawṭaw 10 hrawng a khen, bomrap nih 6 a khen i Inaka bom nih 4 a khen. Drone in bom kan thlak hna caah mawṭaw pawl siseh, himnak a lakpiaktu pyusawhtee, SAC ralkap a thi an tam” tiah PPDF rianngeitu nih Khit Thit ah a chim.
Cun Sagaing ramṭhen, Kyaukmyaung peng in Wetlet peng ah a lut mi SAC ralkap pawl cu PDF phufonh nih lampi in an rak bawh hna i voi 3 tiang an kah hna caah SAC ralkap 7 an thi tiah Hliatsi Guerrilla phu nih a thanh.
May 30 chun sml 2:00pm hrawng ah Kyaukmyaung peng, Shwekyin khuate in Wetlet peng, Htanaung khuate ah thazang 50 hrawng in a lut mi SAC ralkap pawl cu Htanaung khua lulei ah an kah hna i SAC ralkap 3 an thi, Thakyay khua pawng ah bomrap an puah hnawh chap hna i SAC ralkap 2 an thi tiah theih a si.
Cun June 1 ah Wetlet khuachung in thazang 50 hrawng in a rak chuak mi SAC ralkap pawl le Kyaukmyaung peng lei in a rak chuak mi SAC ralkap 20 hrawng cu Sinnin khuate pawng ah an kah hna i SAC ralkap 2 an thi, tampi an i hliam tiah theih a si.
Kahdohnak chung ah Hliatsii Guerrilla phu, People’s Servant Revolution (Wetlet), Nattaung Naga PDF, Singu PDF, Wetlet PDF le Shwebo pengkomh No. 23 Battalion hna bawm in SAC ralkap an doh hna hi a si.
About The Author
