Pauk, Pale, Kawlin le Demoso peng kahdohnak ah SAC ralkap 98 an thi, PDF 8 an nunnak a liam

0

The Chinland Post | 2022 April 12 – Pauk peng, Pale peng, Kawlin le Demoso kahdohnak ah SAC ralkap 98 an thi i 15 a nung in an tlaih hna. PDF 8 nih ram le miphun caah nunnak an pek tiah PDF pawl thawngthanhnak in theih a si.

Magway ramṭhen, Pauk peng, Kya U khua pawng khuate pawl mei a khang lenmi SAC ralkap le mipi hriamtlai phu pawl karlak ah kahdohnak a chuak i SAC ralkap a tlawmbik 25 an thi tiah PDF nih an thanh.

April 11 zaan sml 7:30pm tiang ah, SAC ralkap pawl cu  Seikphyu peng lei ah an zaam i mipi hriamtlai phu hna nih dawi in an kah hna tiah theih a si.

“SAC ralkap pawl nih an hawile ruak hmanh an char kho lo. Hriam zong tampi an thlau tak. An tlik tukning hi. Mipi hriamtlai phu hna nih kan dawi lio hna a si. Nikhat chung kan pawngkam khuate hna mei in an khangh lengmang caah kan tuar kho ti lo, SAC ralkap pawl a hram in bongh dih ding in biakhiahnak kan ngei cang” tiah PDF in biachimnak nawl a ngeitu nih April 11 ah Khit Thit ah a chim.

SAC ralkap pawl cu April zarhhnihnak thok in Pauk peng, Seikphyu peng hna ah thazang tampi in kahdohnak an tuah, khuate hna mei in an khangh. April 11 lawng ah Shahla khua, Taungcho khua, Innngedawng khua, Taungbat khua, Zeetaw khua a simi khuate 10 cu an khua ning ngawt in an khanghpiak hna tiah theih a si.

SAC ralkap pawl cu cuka hmunhma PDF pawl leng ah PDF-Lawngshay, CDF hna fonh in Kadohnak ah an i bawm tiah theih a si.

Sagaing ramṭhen, Pale peng le Magway ramṭhen Myaing peng ah a ummi khua 11 ah kahdohnak a tuahmi SAC ralkap thazang 64 cu April 2-10 tiang ni 8 chung mipi hriamtlai phu pawl he kahdohnak voi 9 a chuak i SAC ralkap 23 an thi, 8 nih hliamhma an tuar.

People Revolution Army (PRA) le Pale, Myaing hmunhma mipi hriamtlai phu hna fonh in SAC ralkap pawl an kah hna hi a si i mipi hriamtlai 2 nih ram le miphun caah an nunnak an pek tiah PRA nih a thanh.

Sagaing ramṭhen, Kawlin peng, Kawlin-Kyunhla lam cungah a ummi pinta palik sakhaan le sianginn ah hmunhma a khuarmi SAC ralkap pawl cu April 11 zinglei sml 1:30am hrawng ah mipi hriamtlai phu hna nih an kah hna caah Pyusawhtee pawl telh in SAC ralkap 30 an thah hna. Ralkap 15 a nung in an tlaih hna tiah Khit Thit nih a langhter.

April 11 Karenni ram, Demoso peng Naungpale ah KA, KNDF phukomh hna le SAC ralkap karlak ah zinglei sml 6:00am-10:30am tiang kahdohnak a chuak. Cu kahdohnak ahcun, SAC ralkap 20 an thi i KNDF pasalṭha 6 nih ram le miphun caah an nunnak an pek tiah Karenni’s Voice nih a langhter.

About The Author

Na ruahning rak langhter ve.. (Leave a comment)

%d bloggers like this: