Pauktaw Khua Cu AA Nih An Lak Cang
The Chinland Post | 2023 November 22 — Ralkap nih ni 6 chung khamhnak le sal ah an tlaih mi hngakchia le fapawi lio nu telh in khuami 100 hrawng cu him tein an khamh khawh cang hna tiah AA nih November 21 ah thawng a thanh.
Pauktaw khua, November 16 ah kahdohnak a chuak i ralkap lei nih khamhnak le sal caah an tlaih mi phungki, upa, hngakchia le fapawi lio hnu cheukhat hna telh in khuami 100 hrawng cu kahdohnak chung in an khamh hna.
Cun November 21 kahdohnak ah ralkap lei 100 hrawng an thih bantuk in 18 nak tlawm lo a nung in an tlaih hna tiah AA he aa naihniam mi nih People’s Spring ah an chim.
Sal ca ah tlaih mi khuami pawl kan khamh khawh hna, kahdohnak a fak i ralkap lei a thi mi an tam, ralkap hriam cheukhat zong an lak khawh i AA ralkap cheukhat zong an i hliam tiah AA nih a thanh.
Ralkap pawl an zaam hnu November 21 zaan sml 7:30pm hrawng ah Pauktaw khua cu AA nih an uk cang tiah People’s Spring nih cun a langhter fawn.
Pauktaw palek sakhaan in palek pawl zong November 16 zinglei ah AA sin ah an i fonh dih hnu in kahdohnak a fah hi a si.
