Paungde Ah SAC Ralkap Pawl Nihnih Chung Ah Voi 3 An Doh Hna
The Chinland Post | 2023 July 4 — Bago ramṭhen, Paungde peng ah thazang 50 leng in khuate lei ah a lut mi SAC ralkap pawl cu ni 2 chung ah voi 3 an doh hna tiah Paungde PDF nih cathanh an chuah.
July 2 ah Paungde peng, Taungkamauk khua in a rak chuak mi SAC ralkap 30 leng le Paukbinkwin khua in a rak chuak mi SAC ralkap 20 leng fonh in Yitma khua lei an kal lio ah Paungde PDF nih bomrap an puah hnawh hna.
Bomrap puah hnawh ruang ah SAC ralkap 3 fak ngai in an i hliam tiah an thanh.
Cubantuk in thazang 30 hrawng SAC ralkap pawl cu Yitma tlang in Taungkamauk lei ah July 3 ah an ṭum ṭhan i zinglei sml 9:00am hrawng ah PPDF nih an hnulei in an kah hna i SAC ralkap 1 a thi tiah theih a si.
Cun SAC ralkap pawl cu tlangthluan hrawng in Bago Yoma lei an ṭum lio July 3 zaanlei sml 4:00pm hrawng ah PPDF nih an kah ṭhan hna i a thi mi cazin fiang in theih a si rih lo tiah an langhter.
About The Author
