Pawngkam Zohkhenhnak Kong Khamhnak Rian A Tuantu Mino Bu Hi Chin Cozah Nih Nan Bawmh Hna Awk A Si; MP Van Thawng

Salai Elvis| 2018 November 25|ย Khuate lei pengtlang (tawngcaw) mino bu le bu pakhat khat nih pawngkam zohkhenhnak kongah tizu ngacel an khammi pawl hi Chin ramkulh cozah nih tha nan pek hna i nan bawmh hna awk a si tiah MP Pu Van Thawng nih a chim.

November 24 khuate khuabawi pawl tel in Thantlang khuami le Chin ramkulh cozah ton biaruahnak ah atu bantuk in a chim hi a si.

โ€œChin ramkulh cozah/ Hluttaw nih aa hmaithlak mi chungah pakhat ah aa tel mi pawngkam zohkhenhnak, thingram humhaknak kongah le tizu ngacel humhaknak kongah mi bu in rian a tuanmi an um len. Khuabung, Zephai, Khualhring tlang, Zahnak tlang le a dangdang mino bu hna nih phungning lo in nga a tlaimi Hru a danhmi, Dinamo tibantuk tuah lo dingin an kham hna tiah kan theih. Hi rian cu kam khat lei ah Hluttaw biachahmi an dir kamh zong a si. Cucaah mah hna pawl cu nan bawmh chanh hna i an herhmi kongah nan dir kamh hna awk a si ko, tampi in hi bantuk mino bu an um cio nakhnga thazaang pek an herh” tiah MP Pu Van Thawng nih a chim.

Hi biahalnak cu Thantlang khuami nih thanchonak caah thil an halmi a peh ah a tu bantuk in a chap chih hi a si. Mah pin ah thil phunthum zong Thantlang peng thanchonak caah biahalnak le duhsaknak bia phunthum zong a chim rih.

Dawn le Ralpel khua pehtlaihnak a har caah Bungkhua phone tung a um si cun khi khua hnih cu a ngah ding a si an ti caah Tower tung bunhpiak ding le Dawn le Ralpel khua pawng zongah phone an hman khawhnak tawlrelpiak ding. Khua khat sing 100 nan bawmhmi hna khua 35 bawmh an si cang bantukin khua 35 hrawng an tang rih. Hi kongah thial lengmang mi lo tuahnak in a hmunmi dum le lo tuahnak caah ti a si nain an riantuanmi zoh tikah aa dangpi a rak si. Cu bantuk in cinthlaknak lei a tuahmi hna Zawngtah, Wa-uh, Serthlum tibantuk a cingmi hna zong an um len bantuk in cinthlaknak a tuahmi hna ca zongah ruahpiak ve ding kong le Surbung tlang Vanlawng tual a ngah in cun Thantlang peng caah Hakha lei in i hel ti lo in aa naih deuhnak Khuahring tlang (Tlangte khua lei) lei in tlunkalnak lam hlun ningte in cawh le remhpiak ding kong zong a chim.

Na ruahning rak langhter ve.. (Leave a comment)

%d bloggers like this: