Pehtlai In Ruah A Sur Caah Falam, Matupi Le Mindat Ah Mincimhnak A Chuak

0

Salai Elvis| 2018 June 11| Pehtlai ngai in ruapi a sur caah Falam khuachung Valai veng Pu Rung Thang inn hmai lungrual mi a cim dih. Matupi zong vawlei minh ruang ah inn hnih nih an inn an zaamtak I Mindat market thlang ah vawlei fak ngai in a tolh caah khuami le sangmi an lungre a thei ngaingai tiah theih a si.

Falam khuapi chung vawlei cimmi
Falam khuapi chung vawlei cimmi

June 11 zinglei 5:30 tluk ah vawlei a cimh hi a si. Hi diltlang a cimmi cu 2015 – 2016 kum lio ah anmah thazaang ks. sing 70 dih in an rak tuahmi a si. Hi vawlei cimh ruangah minung aa hliammi an um lo. Ruah sur aa peh rih caah vawlei cimmi cu Muka (sala-eih) in an khuh chung tiah theih a si.

Cu bantuk in June 6 ni ah Matupi khua ah inn 2 zong minung um ngam loin tiang inn kam vawlei a cim ve. Mah ni thiam ah Mindat khua Market an sak lio mi pawng zong a tanglei in vawlei a tolh ve caah lungre thei in an um tiah theih a si.

Hakha khuapi chung sangthen cheukhat zong vawlei a cimmi tete an um pah. Cu lawng si lo in Hakha peng khuate lam cheukhat zong vawlei an cim i tlunkalnak a har ngaingai. Laitlang tiva cheukhat zong minung tan khawh lo tiang in an lian tiah kan theih.

Hakha-Kalay kar le Kalay-Tedim-Rihkhawdar pehtlaihnak lam zong vawlei an tolh, min a cimh caah khualtluangmi harnak an tong theu. Nai zarh chung lawng ah khan min cimh, vawlei tolh ruang ah suimilam 5 chung tiang hna motor tampi le khualtlawngmi tampi a hren hna caah harnak an tong len. Kalay le Taingen kar lam nihin caan saupi chung khualtlawng tampi a hren pah lengmang hna tiah kan theih.

Myanmar ram khuacaan thanhtu zung nih thlichia a hrangmi a um caah ruah hi June 14 tiang paoh cu fak ngai in a sur thluahmah rih ko lai tiah an thanh.
Ref: IPRD Falam, Post of Matupi, Zalen

About The Author

Na ruahning rak langhter ve.. (Leave a comment)

%d bloggers like this: