Perth Western Australia Ah Lai Ram Ceu Nih Zatlang Le Zuamcawh He Champion A Co
Tawk Tling Thang | 2019 February 16| Perth Western, Australia ah February 16 i tuahmi Chin Miphun Ni paih zuamnak ah Hakha Khuahlun in Lai Ram Ceu nih zatlang le zuamcawh kemh in champion a co.
Perth Western, Australia i February 16 ah tuahmi Chin Miphun Ni zatlang paih zuamnak ah Hakah Khuahlun in Lai Ram Ceu nih bual a co. Tambik a teitu hi Lal Bik Cung a si, minung 16 a tei hna.
Zuamcawh paih ah a donghnak bik Thantlang peng, Dawn khuami Thawng Tha Thang le Hakha Khuahlun in Lai Ram Ceu an i pai. Lai Ram Ceu nih khelhnih thlak in voihnih a tei caah zuamcawh paih champion a co. Thawng Tha Thang hi a luancia 2010 kum, Australia paih ah champion a rak co balmi a si.
Lai Ram Ceu cu zatlang paih bualco le zuamcawh paih champion laksawng pin ah a ralaimi World Paih Championship (@ Pu Ang Cung te phu) nih USA i a tuahdingmi paih zuamnak caah vanlawng ticket laksawng zong an pekchih. World Paih Championship paih zuamnak cu a ralaimi June thla hrawng ah tuah an timh tiah kan theih.
Zatlang paih bualco laksawng hi $ 700 a si, Zuamcawh paih champion laksawng hi $1500 le USA kalnak air ticket, tambik teitu laksawng hi $ 200 pin ah minung 16 a teimi hna $320 le a lenglei in $500 hrawng laksawng a co chap. Zuamcawh paih pahnihnak laksawng hi $ 500 a si tiah kan theih.
Western Melbourne, Australia ram, February 16 ah tuahmi Chin Miphun Ni paih zuamnak ah Thantlang peng, Hmawngtlang khuami Chan Cung Lian nih zatlang le zuamcawh he bual a co.
Hika ah Perth Western, Australia zuamcawh an i paihnak le Lai Ram Ceu bual a conak video zoh khawh a si.
Tambik teitu hi Thantlang peng, Leitak khuami Siang Uk Lian a si, minung 9 a tei hna. Chan Cung Lian hi Thantlang peng, Hmawngtlang khuami a si. Zatlang paih bualco laksawng hi $ 500, tambik teitu hi $ 500 a si ve. Zuamcawh champion laksawng hi $1000 a si. Nikum ah zatlang paih he zuamcawh paih he champion cotu cu Aa Nawl a si tiah kan theih.
About The Author
