Phunghrampi Remhnak Bawmchantu Committee Ser Ding In An Fehter Cang
TCP-Hakha| 2019 February 6| February 6 ah tuahmi ramkomh hluttaw tonpumhnak ah phunghrampi remhnak bawmchantu committee ser ding in an fehter cang.
Ramkomh hluttaw palai hna nih mee thlaknak in phunghrampi remhnak bawmchantu committee serding in fehternak an tuah. Ramkomh hluttaw ah mee thla khotu zapi hi 621 an si. Hi chung ah MP 611 nih mee an pek i committee ser a duhtu mee 414, a duhlotu mee 191 le vote thla lomi mee 6 an si. Committee ser a duhtu mee a tamdeuh ruang ah hi biatung cu ramkomh hluttaw Speaker U T. Khun Myat nih a fehter.
Ramkomh hluttaw Speaker U T. Khun Myat nih, “Ramkomh hluttaw Speaker changtu hi committee haotu ah tuanvo kan pek lai. Party kip in palai pawl telh an si l ai bantuk in ralkap palai zong buaktlak te in telh an si lai. Aa tlakmi nicaan ah auh le sawm in ceihmai a si lai. Pumpak (Independent) palai hna zong hi tonpumhnak ah sawm le ceihmainak an ngei lai. Hi committee nih tuahnak nawl, covo a ngeihmi le a riantuan caan (term) zong rikhiahpiak a si lai” tiah a chim.
2008 phunghrampi upadi hi khulrang in remhnak ding ah bawmchantu committee ser ding in ramkomh hluttaw ah Magwe ramthen in Pyithu hluttaw palai U Aung Kyi Nyunt nih 2019 January 29 ah biatung a chuahpi i February 5 ah MP 31 nih ceihmainak an ngeih. Cu dih hnu, nihin ah mee thlaknak in biakhiahnak an tuah hi a si.
Tutan Phunghrampi remhnak ding biatung chuahpimi cung ah ralkap palai nih dohkalhnak caah hluttaw chung ah minute pakhat chung hrawng an zapite in an dir dih. Cu lawng si lo in committee sernak ding kong MP 31 nih ceihmainak an ngeih lio zong ah ralkap palai pakhat hmanh nih an ceihmai duh lo.
Sihmanhsehlaw, Runvennak ralkap bawizik Min Aung Hlaing nihcun, “Phunghrampi remh hi kan duh ve ko. Phungningte belte in remh a hau” tiah media sin ah a chim.
A luancia President U Thein Sein chan zong ah phunghrampi remhnak tuanchuahtu committee cu ramkomh hluttaw nih MP 31 in an rak ser bal. Cu committee nihcun phunghrampi remhnak pohmah ti lo paoh cu upadi zei maw zat an rak remh khawh.
NLD cozah kut chung President hlun U Htin Kyaw le President U Win Myint zong nih zapi sin biacah an chimmi ah an telh veve mi cu phunghrampi remhnak kong hi a si. NLD nih phunghrampi remh khawhnak ding hi election campaign lio te hrimhrim in an i hmaithlakmi a si.
Myanmar ramkhel lei thiamsang cheukhat nih, ‘NLD cozah hi an i um, an i um i kum a dih lai thengte lawng ah phunghrampi remhnak kong an buaipimi hi cu 2020 election campaign caah a si’ tiah a soiseltu an um ve. Asinain, 2008 phunghrampi cu mizapi hnatlaknak le duhnak taktak he tuahsermi si lo in hramhram in sermi upadi asi ruang ah zei bantuk party paoh le rammi paoh nih remh le ser an duh cio dih tiah theih a si.
About The Author
