Phunghrampi Remhnak Ding Biatung Chuahpimi Ruang Ah Ralkap Pawl An Dir Dih

TCP-Hakha| 2019 January 29| January 29 chun ah tuahmi ramkomh hluttaw ah Magwe ramthen in MP U Aung Kyi Nyunt nih a biapimi biatung in phunghrampi remhnak ding bawmchantu committee pakhat ser ding in biatung a chuahpi i ralkap thlahmi palai zapi an dir dih.

Phunghrampi remhnak ding ah bawmchantu committee pakhat ser ding in MP U Aung Kyi Nyunt nih a biapimi biatung a chuahpi.

Cu a chuahpimi cu ralkap palai pakhat nih, “phunghrampi remh hi kan duh tuk ve ko. Asinain, atu bantuk biatung chuahpimi hi cu upadi le cozah riantuan, tuahtuanning le hluttaw riantuan ningcang he aa kalh. A tlawm bik hluttaw palai 20 tal nih min an thutmi upadi ahran an chuahpi hnu lawng ah hluttaw riantuan, tuahtuan ningcang he pehzulh in tawlrel ding a si. Zei pawl dah an remh lai, remh dingmi kha upadi ahran in chuahpi hmasa awk a si” tiah a chim.

MP U Aung Kyi Nyunt nihcun, 2008 phunghrampi remhnak rian tuante le rangte in tuahtuan khawhnak caah phunghrampi upadi remhnak bawmchantu committee pakhat cu aa tlakning in ramkomh hluttaw palai hna he ser ding in ramkomh hluttaw nih ceihpiak ding in ka chuahpi” tiah a chim.

Biatung chuahpimi cu Rangoon ramthen in MP pakhat nih dirkamh cohlannak a tuah. Asinain, ralkap palai hna nih an cohlang duh lo. Cohlan duh lonak caah an zapite in an dir dih. Cu hnu ah hluttaw speaker U T. Khun Myat nih hi biatung hi ceih awk a tlak le tlak lo mee peknak in biakhiahnak kan tuah lai a ti i mee an thlak. Meeting kaimi zapi 601 an si, biatung a cohlangtu mee 394, a cohlang duh lomi mee 17 le mee thla lomi 3 an si. Biatung a dirkamhtu an tamdeuh caah hi biatung cu pehzulh in ramkomh hluttaw ah an ceihmai than lai.

Ralkap palai nih a chimmi cu atu bantuk in ramkomh hluttaw Speaker nih nih a leh.

“Atu biatung hi hluttaw ni-upadi le hluttaw riantuan tuahtuan ningcangte a si ko caah na chimmi cu ka dohkalh. Cucaah, ni-upadi ningte he pehzulh in kan tuahtuan ko lai. Cucaah, mee thlaknak in kan tuah lai. Cu tik hnu ah hluttaw palai hna nih nan duhnak le nan duhlonak zalongte in nan ceihmai cio te lai” a ti. Cu tikah, ralkap palai vialte cu duhlonak langhternak caah an zapi te in an dir dihnak hi a si.

“Phunghrampi upadi remhnak bawmchantu committee pakhat dirhnak kong a cohlangtu mee a tamdeuh caah hi kong cu January 31, ramkomh hluttaw ah kan ceih than lai. Hi kong a cohlang kho lomi nan um sual ahcun hluttaw zung January 30 chun ah min cazin rak pe uh” tiah ramkomh hluttaw spaker U T. Khun Myat nih a chim.

Hika link ah video in zoh le ngaih khawh a si. 

Na ruahning rak langhter ve.. (Leave a comment)

%d bloggers like this: