Pi Za Tlem; Chin Cozah Nih Hakha Vawlei Hmun Miphun Dang Sin Zuarh A Timh

Tawk Tling Thang| 2019 January 21| Chin ramkulh cozah nih Hakha khuapi chung ah innhmun ekah 600 renglo samh an timh. Cu samh an timhmi kong he pehtlai in MP hlun Pi Za Tlem a lungtling lo tiah kan theih.

Chin ramkulh cozah nih innhmun 600 renglo samh an timhmi kong he pehtlai in MP hlun Pi Za Tlem nih atu bantuk in The Chinland Post ah a chim.

“Hakha Town Plan caah mizapi ngeihmi hmun ekah 600 renglo cu cozah chawva caah Chin ramkulh cozah nih Chin miphun sin lawng ah si lo in miphun dang Kawl mirum sin ah zuar an timh. Hihi, kan Hakha vawlei hmun a thatnak bik le a sathawtnak bikbik hmun an si.  Hiti miphun dang nih kan ram ah vawlei hmun an ngeih ding cu ka duh bak lo. Federal kan ngah hlan i kan Chinram ah miphun dang nih vawlei hmun a thatnak bikbik an ngah hnga ding a si cun vawlei hmun hi tongh lo le samh lo in um rih hna sehlaw ti ka duh. Cuti si lo in kan vawlei cia ah miphun dang vawlei hmun an pek hna ding a si cun daite in um awk a tha lai lo, fakpi in kan dohkalh lai”.

Hakha Khuathar in pupa ram ngei upa pakhat nih, “Pupa ram a um lo ti in ka hmun tampi a kan chuh. Cu a kan chuhmi hmun lila cu riantuan man caah Kawl company zuarh an timh hna tiin ka theih. Cuti zuarh an timhnak hna zong cu Chin cozah nih Kawl company sin ah leiba an ngeih ruang ah a si lai ti ka ruah” tiah The Chinland Post ah a chim.

“Hakha cu Chin khualipi a si ca le inn ngei lo innhlang an tamtuk caah ekah 676 innhmun thar kan samh lai. Atu hi town plan zohthiam le tuahthiam nih an zoh cuahmah lio a si. Atu hmun kan samh tiknak hmun hi Cawbuk le CCU pawng hrawnghrang khi a si. Ekah 676 in a hmun zoh a si cang. Hi ekah 676 chung ah inn hmun zeizat dah a chuak te lai timi cu a fiang kho rih lo. Thla hnih chung ah innhmun a chuak lai i March thla hrawng khin cun zapi sin ah samh khawh a si te ko lai. Innhmun ngei lo, innhlang hi papek in ruahpiak an si te lai. Asinain, zeitindah innhmun pek le samh a si lai timi cu biakhiahnak kan tuah rih lo”.

“Innhmun kan samh tikah hin cozah nih lam, hlei, sianginn, certual tibantuk tuahpiak dih a hau. Hi vialte tuahnak caah budget tampi a dih caah alak (free) in pek awk an tha lai lo. A tlawmbik ks. sing 5 asiloah sing 10 (1,000,000) paoh cu laak an si te ko lai. Innhmun a that deuhnak cheukhat hoihna cu ks. sing 20 in ks. sing 50 tiang zong a phan te kho  men” tiah Minister U Soe Htet nih a biapeh ah a chimchih.

Hakha lothlo phu le hmun ngei cheukhat nih Chinram cozah nih innhmun caah ekah 700 le khuapi area ekah 28000 a samhmi cung ah dohkalhnak lamzawh ding in tuni (January 21) cozah zung ah chiah an chiah cang. Hi ca chia tu ah an haotu cu MP hlun Pi Za Tlem a si tiah kan theih.

Na ruahning rak langhter ve.. (Leave a comment)

%d bloggers like this: