Pinlaybu ah ni 12 chung kahdohnak a fak, Captain telh in SAC ralkap 40 leng an thi
The Chinland Post | 2022 April 12 – Sagaing ramṭhen, Punlaybu hmunhma ah mipi hriamtlai phu le SAC ralkap karlak ah ni 12 chung kahdohnak a chuak i Capitain telh in SAC ralkap 40 leng an thi tiah RFA nih a hlathlai i a langhter.
SAC ralkap nih kahdohnak an thok hmasa i March 29 in April 9 tiang ni 12 chung kahdohnak ah SAC nih vanlawng a hman tiah PDF in biachimnak nawl a ngeitu nih RFA ah a chim.
“SAC lei in Captain 1, Lieutenant 1, Sergeant 2 telh in 40 leng an thi. Kahdohnak hi ni 12 chung a rau. An mah lei nih kahdohnak an thok hmasa. Vanlawng he an i bawmh caah hnu kan kirtak hna. Helicopter in voi 12, Jet in voi 2 an rak kah, mi an chap hna”.
March 29 in Pinlaybu peng ah kahdohnak a chuak i SAC nih Helicopter in voi 2 an kah ruangah PDF sakhaan pakhat an sung nain zaanlei sang ah an lak khawh ṭhan tiah theih a si.
SAC ralkap nih Pinlaybu Mansi tiang kahdohnak a tuah caah April 8 ah Pinlaybu General Administration Zung (Htwe-Oak) Pura umnak, bank le mi thlunnak (Yeik-Ta) tiang kan lak khawh. Palik sakhaan tiang lak kan i timh lioah Jet le Helicopter in an rak kan kah caah hnu kan kir ṭhan tiah PDF nih an chim.
Chaklei Pinlaybu in meng 8 aa hlatnak ah KIA le PDF fonh in sakhaan an sak ti kan theih caah hmunhma zohfelnak kan tuah a si tiah Major-General Zaw Min Htun nih RFA ah a chim.
“Chaklei le nichuahlei ah ralkap pawl an kal lio April 7,8 ah khuachung an rak lut. Ralkap pawl an thazang a der lio a si caah hmunhma cheukhat cu kaltak a si. April 8,9,10 ah khuachung tlaih khawhnak hnga kan i zuam ṭhan. Terrorist (Tu-Pung) phu pawl chaklei ah an kir. An mah sin in hriam le ruak cheukhat kan hmuh khawh. Kan mah lei in riansang a tlaimi cheukhat a thimi, aa hliammi an um” tiah Zaw Min Htun nih RFA ah a chim.
Ralkap nih a thanhning ah KIA/PDF ruak 8, M-22 zuun 5, AK-47 zuun 2, KIA chuah 40MM 1, 7.62MM Sniper 1, M-22 kuanbawm 22, M-22 kuan 1345, 7.62 Sniper kuan 115, 40MM bom 9, KIA chuah hridawhmi bom 19, 60MM bom 17, Grenade 1 kan chuh khawh tiah a langhter.
Cu kahdohnak ah riit sii kan fim khawh tiah kap hnih ning in an thanh.
Kahdohnak ruangah Pinlaybu peng khua 10 in mipi 2,000 leng himnak ah an zaam tiah RFA nih a langhter.
Pinlaybu khua hi Sagaing ramṭhen, Katha peng, Kawlin chungah Kachin ram he zong aa peh bantuk in Kawlin khua Nitlakchaklei meng 25 aa hlatnak Mu tiva cungah a ummi meng 41 a saumi mawṭaw lam he aa tlai chih.
About The Author
