Plastic Thilri Hman Tilo Dingin EU Nih Biatung A Dirh
Salai Aung Aung| 2018 May 29| Voikhat lawng hman ding in sermi plastic thilri pawl phih, hman lo dingin European Union nih biatung a dirh. Phih dingmi ah plastic in sermi kikthlum hang dawpnak pep, hna ek coihnak lachon fung, plastic pakan le plastic keu pawl an i tel. Rili chungah plastic tamtuk a um mi zorternak dingah tu bantuk an phih hi a si.
EU Commission i a tha deuh mi phungphai/ningcang sernak lei phu haotu Frans Timmermams nih kan rili pawl hi plastic in an khah cang lengah plastic hi kan ei dingmi chung tiang a phak cang caah minung ngandamnak zong a hnursuan tiah a chim.
Hi biatung an chuahpi mi hi plastic in hmanmi thilri paoh phih dih ding ti siloin plastic airawl ah thildang in tuah a si lai tiah a chim chih fawn.
Asinain zeitik in hi rian hi thawk ding timi bel an fehter rih lo. Hi biatung cu EU Parliament le EU chungtel ram pawl nih fehter ding a si.
PlasticsEurope timi plastic sernak he aa pehtlai mi phu nih cun EU hruaitu pawl nih lamphawk zul in thil tuah hi an hrial ding a si cang. Hlawnhmi thilri tawlrel nak zong tha deuh in an tuah a herh tiah an chim.
Plastic sertu pawl zong an pawcawmnak rian a hnursuan lo ding ah a airawl thil sernak, hman cia mi plastic fimhlawmnak lei kongah kan bawmh ko hna lai tiah EU Commission nih an chim.
Minung nih dingrep ngeilo, duhpaoh ningcang loin plastic kan hlonh ruangah rili hi a thurhnawm tak tak cang.
Hlathlainak a tuahmi phu pakhat nih an hmuhchuah mi cu 2050 ah cun rili ahhin tichung tlong thilnung nak in plastic a tam deuh te lai ti a si.
Thurhnawm tahnak thilri pakhat nih a tahning ahcun kan kiangkap hi plastic kan hlonhmi ruangah zatuak 87% tluk a thurhnawm i thinphan awk ngai ngai dirhmun a si tiah theih a si.
Ref: Mizzima
About The Author
