President Biakamnak Ngeih Hnuin A Voi Khatnak Bik President Nih Pyitaungsuh Hluttaw Ah Bia A Chim Mi
TCP-Online| 2018 March 30| Ramkomh President thar U Win Myint cu tuni (March 30) ah Pyitaungsuh hluttaw ah President biakamnak cu Vice-President hna U Myint Shwe le Pu Henry Van Tho hna he an ngei ti hna. President biakamnak an ngeih hnu in President thar U Win Myint nih mipi sin a voi khatnak bik biachim cu tuni Pyitaungsuh Hluttaw ah chimnak a ngeih colh.
President U Win Myint nih a chimmi cu;
Upatawktlak Pyitaungsuh Hluttaw Speaker, Hluttaw MP palai hna, ramkomh ruahnak petu, ramkomh minister hna le tuzing a rak chuak khomi upattlak rammi dihlak nan kut kan tlaih hna i nan cungah daihnak um ko seh ti thlaza camnak kan vun langhter.
President ka tlin khawh nakding ca mee a ka petu Pyitaungsuh hluutaw palai hna le thazaang a ka petu ka chungkhat dihlak, tuni Pyitaungsuh hluttaw ah President dirhmun in biakamnak ka ngeih hnuah biarocah chimnak caan tha hna ka ngeih caah ka lung aa lawmhnak a hmasabik ah vun langhter than ka duh.
Kawlram minung hna nih ramkomh ruahnak petu le NLD cungah i nan zumhnak hngat bu in mee nan rak pekmi cungah keimah zong nih ka rian cu dingfelte le zumhawktlak tein ka tuan lai.
Atu kan ram hi a zeilei paoh ah chambaunak le harsatnak lawngte in a khat rih caah a zeileikap zong in thazaang chuah in rian a tuan ding kan si rih hna. Vawleicung ram hna hmai zongah soiselnak le itheihthiam lonak in kan um hna. Kan ram mizapi nih atu kan tonmi harnak hna hi a dim tuai lo. Hi vialte hi fawite in cun kan tawlrel kho lai lo nain ka si khawhtawk chuah in le papek in rianhma ah chiah in ka tawlrel hna lai.
Ram mipi dihlak,
Ramkomh cozah nih papek in riantuan an tinhmi (1) A dik felmi upadi a zalennak le ramchung minung kan hunchonak (2) Ramchung ral a daihnak (3) Zaukphung Federal ramkomh sernak ding ah a hrampi a simi phunghrampi remhnak ding hna hi ihmaithlak in rian ka tuan lai.
Cu pinah ram thanchonak ding caah a khul a hnuarmi cozah zung hna zong ka dorh hna lai lo. A dik felmi bia an ceih nakding zong ka kalpi lai. Ziknawh eihmuar zong kan hrawh lai. Minung covo buar a tongmi hna zong ka humven lai. Rithaisii zong kan zorter lai. Mipi nih ngeihmi tangkaa zong sunghnak um loin ka tawlrel lai. Phungning loin leikuang le vawlei hmun chuh a tongmi hna zong upadi ning in bia kan ceihpiak hna lai. Tlanglo rian a tuanmi hna zong an nun kan huncho ter lai. Fimcawnnak lei zong a thangchomi fimcawnnak ah kan chuah lai.
Ram mipi dihlak,
Phunghrampi ningte in nan ka pekmi President rian nih aa tinhmi suttungpi pathum simi; (1) Khat le khat itheihthiamnak (2) Khat le khat upat ipeknak le (3) khat le khat izumtlaknak hna in rian kan tuanti hna lai ti chim ka duh.
Cu pinah, mizapi hnakhaw le mit simi Media zong kan upat lai. Kan ram nih kan i ruahchanmi le kan i tinhmi hna kan phak khawh nakding ah kan si khawhtawk in riantuanti kan zuam cio hna lai.
Vawleicung ram hna hmaiah arfi bang kan ceu than khawhnak ding le, kan limhang hna zong upattlak kan si than khawh nakhnga izuam tulmal in a kal ding kan si.
Kum caan saupi harnak kan rak tonmi hna kha kan fimchimtu ah hmang in zapi nih kan duhmi Democracy ram, minung covo tling tein ngeih le ziknawh eihmuarmi hna kan hloh khawh nakhnga ralrin le fimkhur tein rian kan tuan hna lai.
Ram mipi dihlak,
Ka bia donghnak ah mizapi nih hmuh an duhmi thlennak cu mithmuh bakin kan thlen khawh naklai mizapi he rian kan tuanti hna lai ti biakam pek bu in ka bia ka donghter.
Ref:DVB
About The Author
