President Nih Nawl A Kan Pek Cun I Kahnak Ngol Ding Timhcia Kan Si; Bohmugyoke Aung Kyaw Hoe
City Hunter| 2018 May 30| Kachin ramkulh i kahnak rian ngol ding in President U Win Myint nih upadi he aa tlak in nawl a kan pek a si ahcun ralkap nih nawlpekmi zulhding timhcia kan si tiah Myanmar ramkomh Runvennak Ministry zung in a zungzal chungtel Bohmugyoke Aung Kyaw Hoe nih a chim.
May 29, Naypyidaw thawngthanhnak lei ministry zung ah tuahmi cozah nih mizapi caah an riantuanmi fianternak an tuah lio ah Irrawaddy media nih biahalnak an tuahmi atu bantuk in Runvennak ministry zung nih bialehnak an tuah hi a si.
President U Thein Sein cozah chan ah President nih Kachin ramkulh i cozah ralkap nih kahdohnak an tuahmi ngolpiak ding in nawl a pek hna tikah ralkap nih an zulh. Atu NLD cozah i President a simi nih cu bantuk in nawl pe hna sehlaw an zul lai maw, zul lai lo dah tiah Irrawaddy media nihcun biahalnak a tuah.
Bohmugyoke Aung Kyaw Hoe nih, “Kanmah ralkap cu rampi hruainak tang ah a ummi kan si. Rampi President hi Myanmar rampi lutlai bik a si. Rampi lutlai bik a si caah upadi he aa tlak in nawl a kan pek si cun kanmah ralkap nih zulh colh ding ah timhcia kan si. Zeihmanh zulh khawh lonak ding a um hrimhrim lo” tiah a chim.
Tlangcung hriamtlai phu zong nih NCA ningte in um hna sehlaw zeibantuk buainak hmanh a chuak hnga lo. Cozah ralkap, battalion zunghmunpi luhhnawh in an kah ruang ah buainak a chuahnak hi a si ti zong a chimchih.
“Ramkomh lampi cung ah kai in chawva an kholh hna, mi an thah hna. I kahdohnak an tuah. Cun mine bomb hmanh le hrawh tibantuk a si ahcun kanmah uknak mechanism pawl an si hnga. Cozah mechanism tampi harnak ton khawh a si ruang ah kan lehrulh hna nak hi a si”.
Ralkap lungput hi President zung ah fehter ding in chimnak nawlngeitu sin ah Irrawaddy nih an pehtlai nain aa manh lo ruang ah a hnu ah chawnhbiak ding in message in lehnak a tuah hna.
Ral i kahnak hmun Kachin ramkulh Tanaing peng in Pyithu hluttaw MP U Lin Lin Oo nih hriamtlai buainak daihter ding ah kaphnih ralkap phu hna nih ngol ding a si i ralthawh le i kahnak in tawlrel cu thatlam a hoihmi hmelchunh a si lo. Ral i kah ruang ah a cangmi harnak a biapimi tuanvo latu ding cu cozah an si ruang ah atu lio ral i kah ruang ah pehzulh in ceihmainak pawl ngeih zong a harter deuh khawh.
“Zeibantuk kong hmanh ah ral i kahnak lam in tawlrel kan duh lo. Cozah zong nih ral i kahnak he pehtlai in pakhat khat karlak ah lut in a tuah awk a si. Cuti a si lo cun a nganmi buainak a chuak kho. Cu bantuk thil a hung chuakmi cu a donghnak ah cozah cung ah tuanvo aa khinh kho. Chim ko ahcun ralzaam mi harnak kong pawl hi” tiah NLD party MP U Lin Lin Oo nih a chim.
Ralkap nih tlangcung miphun hmun ah i kahnak ngol ding in Yangon khuapi chung ah zatlang mibu duhnak langhter in lam an zawhmi zong zawh hlah uh tiah thazaang then le buaihnawh an tong. I kahnak ngol ding ah lam a zawhtu hna zong upadi pohmah a phunphun in tlaih le thongthlak an tong.
“Hriamnam i tlaih in an comi caantha hi an thlah siang lo. Hriamnam i tlaih in hiti karhlang in an cawlcangh peng ahcun zeibantuk lam hmanh in remdaihnak lamthluan kan zawh kho lai lo. Cu ruang ah NCA lamzulh in kal lawng ah remdaihnak kan hmu kho lai” tiah Bohmugyoke Aung Kyaw Hoe nih a chim.
“Myanmar ramdaihnak lamthluan hi a nuar tiah ka hmu lo. Remdaihnak hmuhnak caah NCA lamzulh in karhlan ahcun remdaihnak a chuahlonak ding a um lo. NCA lamzulh in karhlan ahcun pakhat le pakhat kan i zum lai, kan dingfel lai. Pakhat le pakhat amiak i chuah lo a herh. Cu bantuk lungput kan ngeih ahcun remdaihnak lamthluan hi a karhlan a nuarhnak ding hrimhrim a um lo. Cucaah, Myanmar ramdaihnak lamthluan a nuarhtertu le amiak a chuahtu hi cozah ralkap kan si lo” tiah Bohmugyoke Aung Kyaw Hoe nih a chim.
Ref: Irrawaddy News, DVB
About The Author
