President Tuanding Cu Daw Aung San Suu Kyi Nih A Khaukhih Cia Cang
Salai Holy Tawk Tling Thang| 2018 March 27| Kawlram hluttaw speaker le a bawmtu thimnak siseh, ramthen le ramkulh Chief Minister thimnak siseh, a biapi bikmi rampi hruaitu Vice President le President thimnak a phichuak cuanh than tikah atu lio rampi ruahnak petu Daw Aung San Suu Kyi nih a rak tumtah ciami ning lawngte in an tling dih ti tluk a si. Cu bantuk in March 28 (thaizing) ah thim le fehter dingmi Myanmar president zong hi Daw Aung San Suu Kyi nih khaukhih ciami asiloah thimciami a ngeih diam cang. Cucu ahodah a si?
President Aa Cuhtu Ding
March 28 (thaizing) ah tuah dingmi ramkomh hluttaw ah President aa cuhtu ding cu U Win Myint (NLD-Pyithu hluttaw), Pu Henry Van Thio (NLD-Amyotha hluttaw) le U Myint Swe (ralkap palai_ USDP) an si. U Win Myint hi Pyithu hluttaw nih President caah an thimmi Pyithu hluttaw Speaker hlun a si. Pu Henry Van Thio le U Myint Swe cu tu lio Myanmar rampi ah Vice President a tuan cuahmah liomi an si.
President Thimning Le Mee Umtuning
2008 phunghrampi pohmah 73nak ah Myanmar rampi President cu ramkomh hluttaw palai nih an thim lai tiah a tial. Ramkomh hluttaw timi cu Pyithu hluttaw le Amyotha hluttaw pahnih fonh khi a si. Ramkomh hluttaw ah MP zapi hi 656 an um. Hi chung ah mizapi thimmi NLD- MP hi 387, party dangdang in mizapi nih thimmi MP zapi hi 60 an si. Mizapi nih thimmi USDP- MP hi 44 an si. Mizapi nih thim lomi 25% in thlahmi ralkap MP hi 166 an si.
U Myint Swe
President thimtu ding asiloah mee petu ding ramkomh hluttaw dirhmun zoh tikah U Myint Swe cu ralkap palai le USDP palai nih an ngeihmi mee vialte an bungh (pek) dih zong ah zakhat ah zakhat in President a tling kho lo timi raltha te in ka chim khawh. Ralkap palai le USDP nih an ngeihmi mee zapi hi 210 lawng a si. NLD le tlangmi MP 447 nih ralkap palai le USDP palai a sinak hrimhrim in hin mee an pe hrimhrim lai lo. Cu pin ah anmah NLD minung hrimhrim kha President tlinter an duh lai i mee an bungh dih ko lai. Cu ruang ah ralkap le USDP ngeihmi mee 210 hmanh hi U Myint Swe nihcun tlingte in a hmu kho lai lo. A tam bik mee 150 hmanh a hmu te hnga maw? Cucaah, Myanmar ram President cu zakhat ah zakhat bak in NLD palai pahnih chung in pakhat a tling hrimhrim ko lai.
2016 President Thimnak Cuanhthannak
2016 kum President thimnak le mee an rak hmuhzat kha hun zohta hmasa rih hna usih. Mah lio ah President aa cuhmi cu U Htin Kyaw, Pu Henry Van Thio le U Myint Swe an si. Mah lio thimnak ah NLD palai hna nih biatakte in U Htin Kyaw kha president caah an mee an rak bungh. Anmah NLD party a simi, Kawl miphun a simi hrimhrim kha President tling seh ti an duh khun ruang ah a si. NLD nih President he Vice President-1 he tling usih timi lungput hmanh ngei lo in President ca bak ahkhan an mee an rak bungh dih ti tluk a si.
Cu lio ah U Htin Kyaw nih mee 360, U Myint Swe nih mee 213, Pu Henry Van Thio nih mee 79 tiah an rak hmu. Pu Henry Van Thio mee petu zoh than tikah tlangmi party in MP 51 le NLD party in MP 28 te lawng nih an rak pek.
Pu Henry Van Thio
Tutan President thimnak ah tah Pu Henry Van Thio nih mee zeizat dah a hmuh te hnga? Catialtu keimah pumpak nihcun President hmuh cu chim hlah, a hlan a rak hmuh zat mee 79 hmanh khi a hmu kho te hnga maw ti ka ruat. Mee 79 hmanh hmu lo, faktuk in an tei sual lai tiah ka thin kaa domh cia. Chin miphun cawisangtu ding le a limhang a tlaklonak ding ah cu lawng cu hmu hraam hlah seh. Vice President U Myint Swe le Henry Van Thio sin ah ramkomh hluttaw mee aa bungh lo ahcun aho sin ah dah aa bungh ko lai?
U Win Myint
U Win Myint cu 1988 liote in NLD minung a si cang. Suu Kyi nih a ngamhtlakmi, a bochanmi le a zumhmi pa a si. Cu ruang ah Pyithu hluttaw Speaker thutdan ah a chiah. Amah hi Central NLD party committee (CEC) ah Secretary chungtel pakhat zong a si. President U Htin Kyaw nih rian a chuahtak ni thengmang ah Pyithu hluttaw Speaker rian a chuahtak ve. Pyithu hluttaw nih President caah an chuahpi hnu ah Vice President ah an thim. Vice President thutdan in President aa cuh ding a si. President U Htyin Kyaw thutdan zaka ah amah hi thimmi a si caah President zong amah lila a si ko hnga lo maw?
Daw Aung San Suu Kyi Asiloah NLD Party Riantuannak
NLD (National League for Democracy) party lutlai le atu lio Myanmar rampi ruahnak petu Daw Aung San Suu Kyi a riantuanning cuanh than tikah a mak ngai. NLD cozah thar kai a hung kai cangka ramkulh le ramthen vialte Chief Minister thimnak siseh, minister rianpeknak siseh, hluttaw speaker le a bawmtu thimnak siseh, Pyithu hluttaw le Amyotha hluttaw speaker le a bawmtu thimnak ah siseh, a biapi bikmi Myanmar rampi Vice President le President thimnak ah siseh Daw Aung San Suu Kyi asiloah NLD party nih anih tling seh ti an duhmi hna le min an tarmi hna paoh nih cu vialte rian cu an tlaih dih ti tluk a si. Phundang in kan chim ahcun Daw Aung San Suu Kyi nih thutdan le rian pek a duhmi nihkhan an hmuh/ tuan taktak ko. Pyitheyzi zung nih a tlaihmi le ralkap nih a tlaihmi zung le rian chim lo paoh cu_.
Daw Aung San Suu Kyi nih amah hi Chief Minister, anih hi hluttaw speaker ah, anih hi Vice President ah, anih hi President ah tiah zapi theih in a chimphuang lo nain tuanvo ngeitu upa a hngalhtermi nih cu a duhnak cu a dongh tiang an tlinh chuahterpiak lengmang. Rampi uknak luban paoh cu amah nih tling seh a timi, a khaukhihmi paoh kha an tling taktak ko. Tutan March 28 ah thim dingmi President zong hi khaukhih ciami a ngei diam ko cang.
Suu Kyi Policy le Biatlang Komnak
President U Htin Kyaw le Pyithu hluttaw Speaker U Win Myint nih March 21 ah an rian an dinhtak veve. Mah hlan deuh ah in Central NLD committee in Secretary chungtel a si U Win Htein nih rian dinhnak ca a tial hmasa bik. Asinain Daw Aung San Suu Kyi nih riandinh a duhpiak lonak kong amah lila nih March 24 ah a chim than.
Hika zawn ah langhter ka duhmi cu President U Htin Kyaw le Pyithu hluttaw Speaker U Win Myint riandinhnak kong hi Daw Aung San Suu Kyi nih ahlankan in a tuakcia dih cang. Suu Kyi hnatlaknak tel lo in rian zong aa din ngam ding an si lo. Anmah lungthawhnak men lawng in aa dinmi zong an si lo. Myanmar rampi thlenremhnak caah Suu Kyi lentecelhnak a si. Pumpululh holh in cun Suu Kyi nih pumpululh a chuihtu mi a hei thlen hna khi a si ko. Hika zawn ah Suu Kyi cu pumpululh holh in cun coach (nipiah) a si i Myanmar ramkhel holh in cun siangpahrang kan ti lai maw, President cung ah nawlngeitu kan ti deuh lai dah, cucu a si. Amah zong nih President cung ah ka um lai tiah thimnak tuah lio ah a rak tibantuk te in rampi ruahnak petu timi dirhmun in President cung ah a um taktak.
Nipiah nih a duhmi paoh a luh/chuahter khawh bantuk in a chuihter khawh hna. Cu ruang ah President U Htin Kyaw cu puai dih hlan ah a chuahter cang. A chuah hlan in aho dah ka luhter lai timi kha fiangte in biakhiahnak aa tuah cia cang. Cucaah Myanmar President a tuan dingmi cu Daw Aung San Suu Kyi nih a khaukhih cia cang. Cu a khaukhih ciami cu thaizing ah tuahmi ramkomh hluttaw ah vawleicung ram zakip nih ahodah a si timi fiangte in kan hmuh khawh cang lai.
Daw Aung San Suu Kyi nih a khaukhih ciami cu a cunglei thil umtuning felte in zoh tikah U Win Myint hi a si ko.
Hngalhternak: Hi cabia cu The Chinland Post hmuhning le lungput a si lo, catialtu pumpak hmuhning in tialmi cabia a si.
About The Author
