President U Win Myint; Chin Miphun Cu Zaukphung Theipar An Tep Cang

0

Tawk Tling Thang| 2019 February 21| Akum 71nak, Hakha ah tuahmi Chin Miphun Ni ah Myanmar rampi President U Win Myint nih Chin miphun cu zaukphung theipar an tep cang tiah biarocah forhfialnak bia a chim.

Chin ramkulh huap in Hakha ah tuahmi Chin Miphun Ni caanhmannak ah President U Win Myint nih atu bantuk in achim hi a si.

“Chin Miphun cu zaukphung (democracy value) hi biapi ah nan chiah i nuhrin covo nan upat cangka in zaukphung theipar nan tep cang. Chin miphun nih zaukphung i hruainak biapi ah nan chiahmi hi Chinram lawng ah si lo in ramkomh dirhmun tiang in zaukphung tahfung he aa tlak in biapi ah nan chiah khawh a herh tuk” tiah February 20, Vomtumaung certual i Chin Miphun Ni caanhmannak ah a chim.

Chin ramkulh ah miphun tengnge 53 nan um, hiti nan i khawh lonak te hi Chin ramkulh aa dawhnak a si bantuk in lungrualnak thazaang zong a si. Hi bantuk aa dawhnak le lungrualnak hi pehzulh in dirpi i ramkomh a fehnak ding ah nan zapi lungrual te in nan i zuam ding thapek kan duh hna tiah a chim.

Tlangcung miphun vialte nih kan i hngahhlangmi zaukphung, miphun lungrualnak le mahte khuakhan lairelnak nawl aa-mah-khaan a pe khomi zaukphung federal ramkomh sernak caah Chin miphun unau hna nih a fekmi ramkomh lungput he pehtlai i bawmhnak he nan kan zuampiak naklai fakpi in forhfial kaan duh hna” tiah tukum, Chin Miphun Ni caah President U Win Myint nih biarocah a cakuatmi ah hitihin aa tial.

Hi biarocah cakuat cu Chin ramkulh Chief Minister Salai Lian Luai nih a rel.

Tukum, Chin Miphun Ni ah ramkomh cozah in aa tel khomi hna cu; President U Win Myint le a nupi Daw Cho Cho, ramkomh minister in Lt-Gen Kyaw Swe, Lt-Gen Ye Aung, U Thant Sin Maung, U Thein Swe, and U Han Zaw pin ah Vice Prsident Henry Van Thio nupi Dr. Anna Sui Hluan an si.

President U Win Myint cu February 20 zingka ah Hakha a phan i February 21 chun in a kir than cang. February 20 ah Khuachuanhnak tlang i sakmi Lawng Innka le Parthlaam a zoh. Ferbruary 21 zing ah Pura le phungki sianginn a zoh dih in Hakha Town Hall ah cozah zungkip riantuantu upa hne he ton biaruahnak an ngei.

U Win Myint hi Pyithu hluttaw speaker rian a tuan lio 2017 kum ah Hakha a rak phan bal cang, tutan hi a voihnihnak a phak a si. President a tuan hnu in a hmasabik Chinram a phak a si tiah kan theih.

Ramkomh dirhmun in CNF/A le cozah chawnbiaknak le hnatlaknak min an thut hnu in Chin Miphun Ni (Chin National Day) tiah zalongte in tuah khawh a si. Cu hlan cu cozah nih Chin State Day tiah tuahter a rak si.

2012 May thla ah Cozah le CNF/A nih January 3 cu Chin State Day siseh law February 20 cu Chin National Day siseh phungningte in hnatlaknak min an rak thut.

About The Author

Na ruahning rak langhter ve.. (Leave a comment)

%d bloggers like this: