President U Win Myint Nih Hakha Khuacuanhnak Parthlaam Sakmi A Zoh

0

Tawk Tling Thang| 2019 February 21| Chin ramkulh khualipi Hakha a rak phanmi Myanmar rampi President U Win Myint nih Hakha khuacuanhnak hmun i sakmi Parthlaam (tower) a zoh tiah kan theih.

Myanmar rampi President U Win Myint cu February 20 zingka ah Helicopter in Hakha a rak phan. Hakha ah tuahmi Chin Miphun Ni caanhmannak ah sunglawi ngai in aa tel kho. Chin Miphun Ni caanhmannak, khuangcawi zohnak tibantuk in caan a hman dih hnu zanlei sang ah Hakha khuacuanhnak hmun ah sakmi Lawng Innka le Parthlam sakmi a zoh. Parthlaam cung in khuacuanhnak le a nupi Daw Cho Cho telh in tuanvo ngeitu hna he hmanthlaktinak an ngei kho.

Hakha Khuacuanhnak hmun ah sakmi Parthlam cu a min ah Pu Henry Van Thio Parthlam tiah min an bunh. Hi khuacuanhnak Parthlam luhnak cu Lai Kutka timi “Lawng” in chon le kulh a si. Parthlam hi Vice President Henry Van Thio nih ks. sing 50 (5,000,000) hrambunh hmasa nakin sakmi a si. Hi Parthlam saknak cu cozah tangka fangkhat hmanh kan hmang lo, ramchung Chin upa hna kutsamhmi chawva, a zapi ks.64,580,000 dih in kan sak. Lai kutka timi “Lawng” saknak belte cu cozah (Sipin) budget aa tel tiah tiah kan theih.

Hi Parthlam cu 2017 April 1 in Power Seven company nih sak hram a thawk 2019 January 21 ah Myanmar rampi ruahnak petu Daw Aung San Suu Kyi nih hunnak a tuah.

President U Win Myint cu February 20 zan Hakha ah a riak. Hluttaw zungthar sakmi ah meiphu kau in nunphung laam hmuhsaktu hna he laamtinak in caan a hmang. February 21 zingka ah Pura le phungki sianginn a zoh. Cu hnu ah Town Hall ah cozah zungkip riantuantu hna he ton biaruahnak a ngei.

Pyithu Hluttaw Speaker a tuan lio 2017 kum ah U Win Myint hi Hakha rak phan bal cang. Atu Parthlaam saknak hmun hi a rak zoh bal cang. Tutan hi avoi 2nak Hakha a phak le President a tlin hnu in a hmasa bik Chinram a phak a si.

About The Author

Na ruahning rak langhter ve.. (Leave a comment)

%d bloggers like this: