President U Win Myint Nih Surbung Vanlawng Tual Sakmi A Zohfel

Tawk Tling Thang| 2019 February 22| 2020 kum chung ah lim ding in an sak cuahmah Surbung tlang vanlawng tual cu President U Win Myint nih February 21 chun ah a zohfel tiah kan theih.

 February 20, Hakha ah tuahmi Chin Miphun Ni ah a rak tlungmi President U Win Myint nih February 21 chun ah Surbung tlang vanlawng tual sak cuahmah liopi a zohfel. Chin ramkulh cozah in Chief Minister Salai Lian Luai nih a zulh.

Vanlawng lei tawlreltu zung in General Director U Min Lwin le tuanvo ngeitu upa hna nih an riantuanmi Projector in fianternak le hmuhsaknak an ngeih. Cu dih hnu ah Phorhtlunnak le Pehtlaihnak ramkomh minister U Thant Sin Maung nih fianternak a tuah chap.

President U Win Myint nih, hi vanlawng tual cu rikhiahmi caan chung ah a tha bik in lim khawh nan i zuam lai. Hi vanlawng tual nan saknak ah pawngkam rawhralnak nih a hnorsuan khawh lonak le a hrawh khawh lonak ding sak nan i zuam fawn lai tiah bia a cahtak hna.

Chin Times TV nih 2018 December thla ah a thlakmi Surbung tlang vanlawng tual sak liomi video hika ah zoh khawh a si. 

 Surbung tlang vanlawng tual cu zatuak 50% renglo an lim cang. 2019 kum chung ah vanlawng tliknak ding kat-ta-ya pe 1000 an phah lai. Cu pin ah a herhmi concrete zong an phah chap rih lai. Surbung tlang vanlawng tual cu Kawlram chung vanlawng lei thiamsang hna nih tuanvo laak in an tuan. Vanlawng tual cu 2020 kum chung ah dih ding in an tuan cuahmah liopi a si.

“Surbung tlang vanlawng tual saknak caah ramkomh cozah nih ks. 37billion pek a si nain Kawlram cozah budget a hnorsuan tuk ding a si caah ti, mei le lam cu nanmah ramkulh budget chung in tuan ve uh an kan ti. Cu ruang ah ti, mei le lam kong hi Chin ramkulh cozah budget in tuan a si lai. Tukum chung ah pe 2000 chung hi lungphah in kat-ta-ya kan toih lai” tiah Chief Minister nih 2018 November 19, Hakha Town Hall ah tuahmi mizapi he ton biaruahnak ah a chim.

“Surbung tlang vanlawng tual hi hmailei ah cun Kawlram lawng si lo in Singapore, Malaysia, Thailand, India he hnatlaknak kan ser lai i tlungkal kho ding in timhtuahnak kan ngei” tiah Chief Minister Salai Lian Luai nih a chimchih.

Surbung tlang vanlawng tual cu 2013 kum ah tuahding in plan an suai i 2015 kum lawng in sak hram an thawk khawh. Surbung tlang cu Falam khua in khan riat le cheu a hlatnak hmun ah a um.

Surbung tlang Vanlawng tual cu a tliknak ding a sau pe 6000, a vaang pe 100 a si i hi Vanlawng tumnak hmun nih a rihzan pound 50,000 a tuarh ding le ATR-72 Vanlawng phun a tum kho lai tiah theih a si.

Kawlram chung ah vanlawng tual a um rih lonak cu Chin ramkulh pakhat lawnglawng a si. Cu lawng si lo in Kawlram chung ah lam le sul a chiabik zong Chin ramkulh a si. University a ngei rih lomi zong Chin ramkulh pakhat lawnglawng a si fawn tiah kan theih.

Video Credit: Chin State men lawng silo Tlangram pumhuap ah le Myanmar ramhuap ih Vanzam ṭumhmun, Airport ṭhabik dingih ruahmi Surbung Airport mawi takin Thang Boo in Drone thawn a zukmi a si (Chin Times TV)

Na ruahning rak langhter ve.. (Leave a comment)

%d bloggers like this: