Pu Ang Cung; Naga Pawl Hi Rung Lian Ceu Nih A Tei Hna Lai Tiah 70% In Ka Zumh

0

Tawk Tling Thang| 2019 February 6| Nagaland Paih Phu (The Nagaland Wrestling Association) nih a tuahdingmi avoi 12nak paih zuamnak Open Naga Wrestling cu a ralaimi March 6, an ram khualipi Kohima an tuah lai. Hi paih zuamnak ah Rung Lian Ceu nih Naga pawl hi a tei ko hna lai tiah World Paih Champsion Haotu nih a chim.

Hi kong he pehtlai in World Paih Championship dirhtu le haotu a simi Pu Ang Cung nih, “Tutan Naga Paih zuamnak ahhin Rung Lian Ceu nih a tei ko hna lai. Nikum, Rung Lian Ceu Hakha a rak tlun lai ahkhan Hakha pawl cu Rung Lian Ceu nih zakhat ah 100%, chimporh ahcun zakhat ah 200% bak in a tei hna lai ti ka rak zumh cia bantuk te in a tei taktak hna. Tutan Naga paih zuamnak hi cu Naga pawl hi Rung Lian Ceu nih an ngan deuh caah tlawmte cu aa harh deuh hna lai. Asinain, Rung Lian Ceu nih a tei hrimhrim ko hna lai ti hi zakhat ah 70% in ka zumh” tiah February 5 ni The Chinland Post ah a chim.

“Nagaland aih zuamnak ah USA in keimah, Rung Lian Ceu le Pastor Tin Za Peng kan kal lai. Denmark ram in Lian Pum (Chuncung), Hakha in Hrang Tin Thang le Mang Hnin Thang le media in Pu Bual Kung le Pu Chan Bik Lian an ra lai. Kannih US lei hi cu dengteo in India ah kan ra lai. Lian Pum tu hi Denmark in Hakha ah a tlung lai i Hakha ummi he hmunkhat te ah Hakha, Tamu lei in an ra lai” tiah The Chinland Post ah a chim.

“Keimah motor in Tamu tiang kan kal lai i Tamu in khin cun anmah lei nih an rak kan don cang lai. Tlunkalnak a dihmi cu Pu Ang Cung nih kanmah US lei nih kan rak tuaktaan te lai a kan ti” tiah Pu Bual Kung nih The Chinland Post ah a chim.

Naga miphun nih an nunphung paih hi an sunhsak ngaingai. Atu lio Naga paih champion hi a khing pound 220 a rit i a khan pe 6′ 2” a sang. World Champion tiah auhmi Rung Lian Ceu hi a khaan pe 5′ 8” a sang i pound 216 hrawng a rit.

Naga Paih Phu hna nih Rung Lian Ceu aa paih lai tiah an thanh. Hi paih zuamnak ah laksawng cu; Pakhatnak laksawng caah Rs. 200,000, Pahnihnak laksawng caah Rs. 150,000, Pathumnak laksawng caah Rs. 100,000 an si.

“Tutan Naga ram ah kan va i paih dingmi hi kanmah World Paih Championship nih kan pehtlaih hna i an i lawm tuk. Rak ra uh, lunglawmte in kan in don hna a kan ti. Zeiruang ah ti ahcun World Paih Championship phu nih kan i tinhmi le Naga Paih Phu nih an i tinhmi aa khat. Cucu, Paih hi vawleicung ramkip nih an theihhngalh i an cohlan khawhnak hnga sunhsak le World level tiang thanchoter ding hi kan hmuitinh a si veve” tiah Pu Ang Cung nih a biapeh ah a chimchih.

World Paih Championship nih aa hmuitinhmi suttung pathum cu; Lai Pa thawng vialte nih Lai Paih in pawcawmnak khim tiang laksawng an hmuh khawhnak ding, ramchung ramleng hmunkhatte ah Lai Paih i hrawmti le i paihti ding, a pathumnak cu Lai Paih hi Sea-game (world level) tiang luhpi ding hi an si tiah kan thieh.

About The Author

Na ruahning rak langhter ve.. (Leave a comment)

%d bloggers like this: