Pu Chum Ling Nih Paletwa Ralzaam Caah Ks. 7,300,000 Bawmhnak A Pek
Salai Cung Cung|2019 July 25| Pu Chum Ling nih Chin ramkulh Paletwa ralzaam caah ks. 5,000,000 Chin ramkulh cozah sin i July 24 zing suimilam 10 ah bawmhnak a pekmi he a zapi bawmhnak a pek cangmi hi ks. 7,300,000 a si cang tiah kan theih.
“Kawl ralkap le AA hriamtlai pawl kar kahdohnak ruang ah Paletwa peng kan Chinmi ralzaam in a ummi hna cu umnak ngei lo in le ei din awk ngei lo harsa tuk in an um ka theih tikah ka lung aa nuam lo i zeitindah ka bawmh khawh ve hna lai ti ka ruat. Cu lio ah Chin ramkulh Sipin minister U Soe Hteh he kan i tong. Cu kan i ton lio ah cun Paletwa ralzaam bawmhnak pek ding ah kan kal lai timi ti a ka chimh tikah cu lio ah cun tangka Ks. 2,000,000 ka rak bawmh hna. Cu hnu ah Siangngakchia mino pawl nih Paletwa bawmhnak caah cabawm a kan pek i tangka Ks. 200,000 ka pek hna. Cun Rual U pawl an ra than i ks. 100,000 ka pek than hna. Cun July 22 ah khan Chin ramkulh Chief minister he kan i tong i Chin ramkulh cozah aiawh in Paletwa lei bawmhnak pek ding ah kan kal hnik ti a ka chimh i naa tel kho ve lai maw a ka ti caah tu bantuk in tangka Ks. 5,000,000 bawmhnak ka pek hi a si. A zapi tein Paletwa ralzaam caah ka bawmhmi hna hi Kyats Sing 73 a si cang” tiah Pu Chum Ling nih The Chinland Post ah a chim.
Hi bawmhnak kong hepehtlai in Pu Chum Ling nih, “Kanmah Chin miphun lakah thlanglei Laitlang pawl hi thanchonak lei ah kanmah nak in an chambau deuh pin ah tubantuk in Kawl ralkap le AA hriamtlai pawl kahdohnak kar an um tikah harsaknak an tong khun. Cucaah zoh sawh sawh ding a si lo, kan mah le si khawh tawk in bawmh cio khawh i zuam hna u sih. Laimi kan thancho khawhnak ding ah cun biatak tein riantuan kan i zuam a hau. Cun kan Laimi thanchonak caah cun alak in mi sin hmuh duhnak lawng ngei lo in mah nih biatak tein riantuan kan herh. Hmailei zong ah ka si khawh chung in ralzaam hna le kokek hartong mi hna caah bawmh khawh kaa zuam peng rih ko lai” tiah a chim.
Hi bawmhnak cohlannak kong he pehtlai in Chin ramkulh cozah ai awh in Minister U Vui Kaw nih, “Tubantuk in Chin ramkulh Paletwa ralzaam hna caah bawmhnak a petu Pu Chum Ling cung ah Chin ramkulh cozah ai awh in lunglawmhnak tampi kan ngei. Tutan bawmhnak pekmi vialte cu Chin ramkulh Chief minister nih Paletwa peng ah kal in bawmhnak a va pek hna” tiah tonpumhnak ah a chim.
Pu Chum Ling nih 1990 kum ah Hakha Sii-inn ah ihkhun 50 a hlut. 1993 kum ah ramkulh ngandamnak zung saknak caah inn hmun pe 100 leng a rak hlut. Cun tu lio Bualpeng Banawhtlang ah Hall a sakpiak lio hna a si. Cun Hakha View Point i City Tower saknak ca zong ah CB Bank bawmhnak halpiak in Sing 200 ka pek hna. Cun tutan Paletwa ralzaam caah 7,300,000 bawmhnak a pek hna hi a si tiah kan theih.
Hika ah bawmhnak kong he pehtlai in amah Pu Chum Ling nih a chimmi video zoh chih khawh a si.
About The Author
