Pu HC Ral Hnin; NLD Cozah Nih Chin Miphun Ni Ah Sakaptu CNF An Kan Hrelh

Tawk Tling Thang| 2019 February 19| Chin Miphun Ni kong ah NLD cozah thar a kaimi nih sakaptu CNA/F (Chin National Army/Front) an hrelh hna tiah Thantlang CNF Liaison Office zung in kan theih.

Hi kong he pehtlai in Thantlang CNF Liaison office zung tuanvo ngeitu lutlai  Pu HC Ral Hnin pehtlaihnak kan tuah tikah atu bantuk in a kan leh.

“Tukum Chin ramkulh huap in Hakha ah tuahdingmi Chin Miphun Ni ah nihnih aa duh ceo lawng ah an kan sawm. Thutdirnak kong tawlrelpiak kan in duh hna caah ahodah a kai kho lai ti a kan hal i minung pahnih min cazin ka pek. Asinain, Hakha kan phak tikah thutdirnak zeihmanh a kan tawlrelpiak lo. Atu tiang pehtlaihnak an kan tuah lo pin ah zeihmanh caan zong an kan pe lo. Thaizing ah tuahdingmi Chin Miphun Ni zinglei caanhmannak ah kannih CNA/F cu kan i tel lai lo. Asinain, Paih zoh belte ahcun kan ra te ko lai.”

“Chin National Day tiah phungningte in kan tuah than khawhnak cu CNF le cozah chawnhbiaknak le kahngol hnatlaknak biahren tuahmi ruang ah a si. Cuti biahren kan tuah kum ah Hakha, CND ah Dr. Lian Hmun Sakhong cu biacah chimnak caan an pek colh. A hmaikum, Mindat zong ah Pu Zing Cung biacah chimnak caan an pek colh. USDP cozah chan ahcun felfaite in thutdirnak kong an kan tawlrel lawng si lo in biachimnak le caanhmannak zong kan ngei kho. A ruang cu sakaptu kan sinak kha fiangte in an hngalh. Asinain, NLD cozah thar a kai hnu cun, a min men te khin an kan sawm i thutdirnak kong zeihmanh an kan tawlrelpiak lo. Nikum Falam ah tuahmi President U Htin Kyaw a rat tan zong CNF kan pu bik PU Zing Cung hoihna cu biachimnak caanpek cu chim hlah, thutnak hmanh khi a kiken te ah thutter. Tukum Hakha ah atu bantuk dirhmun kan phan hoi. Tukum Chin Miphun Ni tlam a tlinnak ding tawlreltu committee ah Dr. Lian Hmung Sakhong hi tabapadih ah an telh i kei hi tlangtlaknak lei committee ah a min men te in an kan telh. Asinain, nihin tiang meeting voikhat hmanh an kan au lo. Fiangko in ka chim ahcun Chin Miphun Ni kong ah sakaptu CNA/F hi NLD cozah nih an kan hrelh. USDP cozah nihcun an kan hrelh bal  lo, cu pin ah biachimnak caan an kan pek peng” tiah a biapeh ah a chimchih.

Hi kong he pehtlai in Chin ramkulh cozah in chimnak nawlngeitu minister U Soe Htet nih, “Chin Miphun Ni tuahnak kong ah felfaite in CNA/F sawm ding in bia kan chah ko. Asinain, sawmnak lei tuanvo latu hna nih an hrelh hna ruang ah a si lai” tiah The Chinland Post ah a chim.

CNF in Defense and Security Secretary Col. Pu Solomon Thangding nih, “Tutan Hakha ah tuahdigmi Chin Miphun Ni ah i tel ding in cozah lei in an kan sawm hrimhrim ka thei lo. Miphun dothlennak a tuahtu CNA/F felfaite in an kan sawm lo le caan  kan pek lomi hi cu a poi hringhran  ko” tiah The Chinland Post ah a chim.

Chin Miphun Ni tiah phungningte in kan tuah khawhnak cu nawlngeitu cozah le CNF hnatlak biakhiahmi ruang ah a si. A luancia 2012 May thla ah union level in CNF le cozah chawnhbiaknak an  ngeih lio ah February 20 cu Chin National Day ah tuah ding in biakhiahnak an rak tuah.

Na ruahning rak langhter ve.. (Leave a comment)

%d bloggers like this: