Pu Henry Van Thio Le Dr. Ral Bawi Chungkhar Nih Tikir UPC Lung Biakinn Hunnak An Tuah Lai

Tawk Tling Thang| 2019 January 15| Thantlang, Tikir Thar ah sakmi Ngun Par Memorial UPC (United Pentecostal Church) biakinn hunnak cu aralaimi January 19 ah sunglawi ngai in hunnak an tuah lai. Hi biakinn signboard hunnak cu Kawlram Vice President a tuan liomi Pu Henry Van Thio le Myanmar ram UPC a dirhtu Dr. Ral Bawi te chungkhar hna nih hunnak an tuah lai tiah kan theih.

Tikir thar ah sakmi UPC biakinn hi a min ah Ngun Par Memorial United Pentecostal Church ti a si. Hi biakinn cu lung in sakmi, biakinn tha ngai a si. January 19 (Zarhte ni) ah sunglawi ngai in Pathian sin pekchanh thlacamnak an tuah lai tiah tuanvo ngeitu upa pakhat sin in kan theih.

Hi kong he pehtlai in Tikir khuami upa pakhat nih, “Ngun Par Memorial United Pentecostal Church Pathian sin pekchanhnak cu January 19 ah sunglawi ngai in tuah kan timh. Hi biakinn pekchanhnak ahhin Vice President Henry Van Thio le Dr. Ral Bawi te chungkhar lawng si lo in Myanmar ramchung UPC lutlai upa tampi le Khrihfabu tampi zong an i tel lai. Atu hi Henry Van Thio a fale le hlasak thiam Sung Tin Par zong Tikir ah an kal cia chung cang. Zapi khual phak hi January 18 a si. Khual phak zan ah Dr. Anna Sui Hluan nih thawngtha bia a kan chimh lai” tiah The Chinland Post ah a chim.

“Tutan Vice President Henry Van Thio hi cozah lei rian si lo in amah pumpak khuallam in a ra lai. A nupi Dr. Anna Sui Hluan cu January 15 zan Hakha a phan cang lai, a nupi he an ra ti lai maw ra ti lai lo timi fiang in hngalh khawh a si lo. Biakinn catar (signboard) hunnak cu Henry Van Thio le Dr. Ral Bawi te chungkhar nih an tuah lai” tiah a biapeh ah a chimchih.

Tikir hi Khuahlun le Khuathar tiin an um, Dam hi Tikir Thar ah a um. Tikir Thar hi inn 60, innchungkhar 80, pa 212 le nu 168, an zapi 380 an si.

Pi Ngun Par (tleicia) hi Vice President Henry Van Thio nu a si. January 20 ah Tikir Dam le Electric Mei hunnak zong Rampi Ruahnak Petu Daw Aung San Suu Kyi nih a tuah lai. Daw Aung San Suu Kyi cu January 20 lawng ah Helicopter in a ra te lai. Tikir Dam hunnak a tuah dih in Thantlang ah chikkhat a lut ta lai i Hakha ah January 20 zan a riak lai tiah Chin ramkulh cozah tuanvo ngeitu sin in theih a si.