Pu Ngai Sak; Chin Miphun Nih Kan Sunghmi Vialte Laak Than A Cu Cang                                                                   

The Chinland Post| 2019 August 26| Chin National League for Democracy (CNLD) party in Vice Chairman Pu Ngai Sak nih  Hakha peng party zung hunnak le signboard tarnak tuah lio mizapi he ton biaruahnak ah ‘Chin Miphun nih kan sunghmi vialte laak than a cu cang’ tiah  a tanglei bantuk in a chim.

“CNLD party nih a biapi bik in aa tinhmi suttung pathum cu; 1). Miphun tlukrualnak (miphun dang kut tang ah um si lo in i tlukrualnak), 2). Mahte khuakhan lairelnak (Nawlngeihnak), 3). Federal ramkomh sernak hi an si. Mirang nih a  kan uk ko nain, kan nunphung, kan biaknak, kan caholh ningte in i uk khawhnak nawl a kan pek. Cun, Ca tiang an kan tuahpiak chap rih fawn. Hlan lio ah kan lungput cu bawi lungput kan rak ngeihmi vialte atu ahcun a tlau dih. Panglong biahrennak ah an ceihmai le hnatlakmi vialte an telh dih ti lo. Biatlang 9 lawng an telh. Federal cu an telh nain miphun tlukrualnak a um lai timi an telh ti lo”.

“A fak tukmi cu nawlngaihnak kan kutcung i aum lo ruang ah Chinmi nih kan tuar, Kachin miphun tibantuk tlangcung miphun nih kan tuar dih. Kawl ca ahcun democracy a ngah ah za, nain tlangcung miphun caah cun a za lo, federal ngah chih a hau. Federal ngah lawnglawng ah mahte khuakhan lairelnak kan ngei kho lai”.

“Ramkomh Ni (Union Day) cu an kan tuahpi nain ramkomh ni nih a chuahpimi a thawtnamnak a muru cu pakhat taktak hmanh kan tep lo. A lengpavuan pi lawng a si, hi vialte cu hlennak lawngte a si.  Cu hlennak cu kan i hngalh lo i union day ahcun Lai angki cu/tlangcung miphun angki le thilthuam cu Kawl mi zong nih an i hruk theu. Nuam ngai in ramkomh ni an kan tuahpi, kan kut kan bengh. Ramkomh Ni asiloah ramkomhnak theipar, hmuitinh le covo vialte kalpi lo le nunpi lo in adeu in Lai miphun nih kan tuah lengmang ve. Panglong hnatlaknak le biahren ning a si lomi ramkomh ni hmannak hi ngol a za cang  lo maw? Kan sunghmi covo le nawlngeihnak vialte laak than caan a za cang  lo maw? Mahti lungput hin maw kan kalpi peng rih ko lai”?

“Hlan lio ahcun kan si a fak ko nain kan thinlung put a rak rum. Asinain, atu ahcun a tlau dih cang. Mi kuttang ah um le mi sin ah thil a haltu va si khi kan i nuam tuk cang mu? Fakpi in ruah a  hau cang. Cucaah, cu vialte kan sunghmi hna kha kan Chin party nih kan laak than a hau lai. Kan hnulei ah thimnak tlaihtleng he pehtlai in kan sunghmi covo le nawlngeihnak vialte hneksaknak caah “Laak Than Cang A Cu Cang” tiah ka tial phah. Mi tampi nih a dik tuk an ti cio. Kan nunphung vialte laak than a hau. Kan vawlei hi an la rih lo nain laak nak ding upadi an tuah cang. Cu zong cu laak than a hau lo maw? Miphun pakhat kan si i miphun dang kuttang i a ummi si lo in le ukmi si lo in mahte in aa uknak nawl laak than a hau lo maw? Panglong biahren hnatlaknak kan tuah i kan lung a tling i  kan sungh thanmi, a kan laakpiak dihmi thil vialte laak than a cu cang lo  maw”?

“CNLD party nih  term khat chung ah federal nan kan laakpiak kho hnga maw tiah Thantlang ah bia an kan hal. Atu ning in cun, Federal hi Chin party lawng nih laak khawh dingmi a si lo, NLD le USDP party lawng zong nih laak khawh dingmi a si lo. Federal cu ralkap zong siseh, party vialte zong siseh, cabuai cung ah thutti in ceihmai a haumi a si. Cucaah, federal a tuah kho lomi NLD le USDP party cu zeicahdah mee nan pek duh? Chin party aiawhtu um lo in federal kongkau ceihmai tikah ahodah aa tel kun  lai? Kan Chin aiawh in Chin ruahnak le thluak he bia a chim khotu kan ngeih a hau hnga lo maw? Cucaah cun, Chin party a hauhnak cu a si. Bia kan i ruah i federal kong kan ceih tikah Chinmi nih kan duhmi federal cu mah hi asi tiah a chimtu ding Chin party cu a hau cang cu ta! USDP nih USDP nih an duhning in policy an suai, NLD nih anmah duhning in policy an suai. Chin party nih Chinram le Chin mizapi nih an duhning in policy kan suai ve. Cu tikah Chinmi nih kan duhmi kha chim an duh ko hmanh ah party dang nih cun hluttaw ah an chim kho ti lo. Zeiruang ah ti ahcun a cunglei in nawl an onh hna lo ruang ah a si. Kan vantha kan ti hnga maw kan vanchia kan ti hnga maw? Atu 45 committee an sermi ah khan Chin thluak le Chin party in biachim khotu ding pakhat hmanh kan i tel lo. Atu ni ah federal kong kan ceihmai dih lo zong ah hmailei kan tefa nih an pehzulh in teinak an hmuh te  lai”.

“Kan Chin miphun hi kan si a fah tuk ruang ah maw? Dinfelnak timi a tlau dih cang. Kan ram riantuannak ah kanmah ca lawng ah kan ruah ve cang. Kan miphun kongkau hi kan rank in thlen zong kan ngamh tuk cang, thil poi ah kan chia kho ti lo. Kanmah pumpak thatnak le miaknak caah cun kan miphun sinak le dirhmun a tumchuk zong ah a tlau zong ah a poi lo a timi kan tamtuk cang. Vuanci si duh ah Kawl party luh zong a poi lo kan ti dih cang. Hi bantuk lungput a rawk dih cangmi hrawh a hau, aho nih dah a hrawh lai? 2010 ah USDP, 2015 ah NLD, 2020 ah Chin Party si ve cang tuah usih. Kanmah Chin miphun kongkau cu kanmah Chin miphun party cung ah dahkaw aa hngat”!

“Chinmi nih mit in kan hmuhmi lam le sul thanchonak, lahkhah einak tibantuk lawng kan cuan kho i mit in hmuh khawh colh lomi miphun sinak, miphun covo, miphun nawlngaihnak, nunphung, caholh le ramri kong tibantuk kan hmu thiam ti lo. Phundang in cun federal uknak lei kha kan hmuthiam in k an cuan thiam ti lo. Federal uknak cu Chin miphun nih kanmah le kanmah thazaang kan i pek le kan i tanpi lawng ah kan ngah lai. A hal ding kan si  lo, kanmah thazaang kan ngeih ve lawng kan ngah ko lai.  Kan tha a um tikah cun an kan upat lai i cabuai cung ah kan thu kho in ceihmainak kan ngei kho lai. Zeiruang ah dah nihin ah Chin party remdaihnak cabuai cung ah kan i tel khawh lo? Chinmi nih Chin party tha na kan pek lo ruang ah a si. Pathian nih miphun dang uknak tang le kuttang ah um lengmang ding cu a kan timhmi kan si lo. Miphun dang he tlukrual te in karhlang ve ding hi a kan timhpiakmi a si ko”.

Hika ah Pu Ngai Sak nih a chimmi video zoh chih khawh a si. Pu Ngai Sak biachimnak hi a tantim in aa thawk lai.

Leave a Commnet

%d bloggers like this: